भजनसंहिता
Psalms
Introduction from this edition
भजनसंहिता
भजनसंहिता
भजनसंहिता को परिचय
भजनसंहिता की किताब गानाहुन अना पिराथना गिनको जमवाड़ा से। हिबरू भासा मा भजन सबद को अरथ से “स्तुति को गाना”। लगत भजन सही मा असो गाना सेत, जोनमा परमेस्वर को स्तुति करयो जावासेत, पर दुसरो परकार को भजन भी सेत। काही परमेस्वर लक मदद माँगन को लाय पिराथनाहुन सेत। जबकि काही बिलाप करासेत, जोन लगत दुख दिसावासेत। असो गाना से, जोन इसरायली राजा को स्तुति करासेत। अना असो गाना से जोनको परयोग लोगगिन को गियान अना परमेस्वर को इक्सा को बारे मा सीकान को लाय कियो जावासेत। भजनगिन को किताब लगत लोखगिन लक लिखयो गयी होती , अना लगत सव साल मा जमा करयो गयी होती। काही भजन लगत जूनो सेत, अना राजा दाऊद को बेरा लिखयो गयो होतो। सही मा बाइबल कव्हासेत, का दाऊद उनमा लक लगत लिखयो होतो। दुसरो भजन यहूदी लोग गिनको बेबीलोन मा कयद लक लवटन को मघा लिखयो गयो होतो। बिद्वान गिनको माननो से का भजन को जमवाड़ा तिसरो अना चवथो सताबदी ईसा को पुढा को आखापाखा मा आखीर रूपमा पहोच गयो होतो। यो अखट्ट रूपमा 150 भजन सेत। जोनला 5 लहान हिस्सा गिनमा बाटो गयो होतो। चाहे वोय गाना होय या पिराथनाहुन, सबरी कविता को रूपमा होय। हिबरू कविता को बारेमा जरासो समजनो भजनगिन ला समजनो मा मदद करहेत। हिबरू कविता को एक खास तत्व बरोबरीपन कहलावा सेत। लेखक हरामेसा भजन मा दोन पद ला एक संग जोडासेत। उदाहरन को लाय, पहेलो लाईन मा एक बात खोलासे, मंग दूसरी लाईन मा तीन मा लक कोनी एक मारग ला अपनावासे। यो या तो जोर देवन को लाय, बेगरो-बेगरो सबद को संग एकच बिचार दोहरावासेत। या एमा पहेलो लाईन को उलट एक बिचार होवासेत। या यो एको बारे मा जादा कहेके पहेलो लाइन को बखान करासेत। भजन की किताब बाइबल को सबलक नामी अना नामी किताब गिनको किताब मा लक एक से। येरूसलेम को मंदिर मा आराधना मा लगत भजनगिन को परयोग कियो गयो होतो। भजन अमीला सिकावासेत का कसो पिराथना करबोन। अना कसो परम परधान परमेस्वर को स्तूती करबोन। भजन 23 ना सोक करन वालो लगत लोग गिनला सांती दियो से। भजन 51 मा लगत लोख गिनला आपरो पापगिन ला परमेस्वर को मोहोरा सुवीकार करन को लाय पेरीत कियो से। भजन 110 आवन वालो मसीहा को मुनादी करके बढावा अना आसा देवासेत। जोन एक राजा अखीन याजक दोनों सेत।
रूपरेखा:
1. भजन संहिता की किताब 1 हिस्सा मा अध्याय 1-41 से।
2. भजन संहिता की किताब 2 हिस्सा मा अध्याय 42-72 सेत।
3. भजन संहिता को किताब 3 हिस्सा मा अध्याय 73-89 सेत।
4. भजन संहिता को किताब 4 हिस्सा मा अध्याय 90-106 सेत।
5. भजन संहिता को किताब 5 हिस्सा मा अध्याय 107-150 से।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.