भजनसंहिता 74

देस को बचाव को लाय पिराथना

आसाप को मस्कील

1ओ परमेस्वर तूना, हरामेसा को लाय

काहे सोड दियो से?

तोरी कोप को स्तो को धुँगा तोरो हेड़ को मेन्डी को बिरोध मा काहे उठासे?

2आपरो लोख को दल जोन ला तूना जूनो जमाना मा मोल लियो होतो,

अना आपरो खुद को हिस्सा को गोत होवन को लाय सुड़ा लियो होतो

अना यो सियोन परबत ला भी जोन मा तूना बास कियो होतो हेत कर।

3बयरी गिन ना पवीतर जघा ला पूरो रीत लक नास कर दियो सेत,

वोना लगातार होन वालो बिनास कन आपरो डग बढाव।

4तोरो बयरी तोरो पवीतर जघा मा जीत को घोसना करयो सेत,

अना आपरो झन्डा गाड़ दियो सेत। अना निसान बना दियो सेत।

5वोय वोना मानूसगिन को जसो सेत

जोन घन्नो जंगल को झाड़ मा टंगीया चलावासेत।

6अना अबा वय वोना भवन कि नक्‍कासी ला,

टंगिया अना हथौड़ा गिन लक तोड़ डाकयो सेत,

7उन ना तोरो पवीतर जघा मा स्तो पेटाय दियो सेत।

अना तोरो नाव को रव्हन को जघा ला पाड के असूद कर डाकयो सेत।

8उन ना मन मा कह्यो “हमी इनला दड़प देबीन।”

उन ना यो देस मा परमेस्वर को सबरी

सभा को जघा ला पेटाय डाकयो सेत।

9आमी ला आमरो कोनी निसान नही चोवासेत,

अब कोनी भविस्यवक्ता नही रह्यो,

न आमरो बीचमा कोनि जाना सेत कब तकन यो दसा रव्हेत?

10ओ परमेस्वर बयरी कब तकन मजाक उड़ाहेत?

का सतरू तोरो नावको निन्दा सदा करतो रहेत?

11तू अपरो उज्जो हात काहे रोकयो रव्हासेत?

वोला आपरो कडिया लक हटाव अखीन उनको अन्त कर डाक।

12परमेस्वर ता जूनो जमाना लक मोरो राजा आय,

उ धरती मा सूटकारा को काम करतो आयो सेत।

13तूना तो आपरो ताकत लक,

सागर को दोन फाड कर दियो 1

तूना तो पानी को मंगर को डोका ला फोड़ डाकयो।

14तू ना तो लिव्यातान 2नाव को पानी मा रव्हन वालो पसू को डोका को तुकड़ा-तुकड़ा

करके जंगली जनावर ला जेवा दियो।3

15तू ना तो सोता खोलके पानी को धारा बहायो,

तू ना तो बारामासी नद्दि ला सूका डाकयो।

16दिवस अना राति भी तोरोच आय!

दिन अना चन्दा ला तू पक्को करयो सेत,

17तू ना तो धरती को सबरी हद ला ठयरायो सेत,

धूपकाल अना थन्डी दूई ला तूना ठयरायो सेत,

18ओ यहोवा, हेत कर कि बयरी ना

नामधराई करयो से,

अना मूरख लोग गिन ना तोरो नाव को निन्दा करयो से।

19अपनो परेवा को पिरान जंगली जनावर को बसमा नोको कर,

अपरो दुखी लोख गिनला नोको बिसार,

20अपरो करार ला हेत कर,

काहेका देस को इन्धार जघा हिन्सा लक भरपूर सेत,

21पिसो हुयो मानूस बेइज्जत होयके नोको लवट नो पडहेत। दीन अना गरीब लोक तोरो नाव को स्तूती कर पाहेत।

22ओ परमेस्वर उठ, आपरो मुक़द्दमा

खुदच लड़;

तोरी जोन नामधराई मूढ़ लक दिवस भर

होतो रव्हासे, वोला हेत कर।

23अपनो बयरी को गरबिला बोल नोको बिसर,

तोरो बिरोधी गिन को हल्ला लगातार

उठतो रव्हासे।