Powari Standard Project
भजनसंहिता 5
सुरक्सा को लाय पिराथना
(परधान बजान वालो को लाय, बन्सी को संग दाऊद को भजन)
ओ यहोवा मोरो बचन ला आयक
अखिन मोरो मन कि लुकयो पिराथना मा धियान लगाव।
ओ मोरो राजा ,मोरो परमेस्वर मोरी पिराथना दोहाई
कन धियान देय, मोरी मदत कर,
काहेका मी तोरोच लक पिराथना करासू।
ओ यहोवा, रोज पहाट ला तोला, मी आपरी भेंट अरपन करासू ,
मी पहेटिया ला पिराथना को जवाब लाय तोरो रास्ता चोहु।
काहेका तु असो परमेस्वर नहात, जोन दुस्टपन लक खुसी होय! काहेका बुराई तोरो संग नही रव्ह सकत।
तोरो जवर घंमडी मानूस नोको आय सकत काहेका तू बूरो मानूस लक घिरना करासेत,
काहेका तू बूरो मानूस लक घिरना करासेत।
तू उनला जो झूठ बोलासेत उनला नास करजोस,
ओ यहोवा तू खूनी अना छल-कपट करन वालो लक घिरना करासेत,
पर मी ता तोरी लगत दया लक मी तोरो मन्दिर मा आवासेऊ।
ओ यहोवा मी तोरो डर मानके तोरो पवीतर मन्दीर मा अराधना करहुन।
ओ यहोवा, तू मोला आपरी नेकी को रास्ता चोवाव।
तू आपरी राह ला मोरो मोहरा सीद्दो कर
काहेका मी दुसमन लक घिरयो सेऊ
काहेका वय लोग सच नही बोलत वय झूठा सेत ,
जो सत्य ला तोड मरोड करासेत
उनको गरो खुलयो कबर को जसो से
वय दुसरो लक साजरी चिकनी-चोपडी बात करासेत।1
ओ परमेस्वर उनला सजा देजोस,
वय अपरो च जुकति मा खुदच पड जाय!
वय लोग तोरो बिदरोह मा होय गयीसेत ,
उनला उनको पाप को कारन बाहेर हेड़,
काहेका वय तोरो लक बिसवासघात करयो से।
पर तू अपरो सरन मा आवन वालो ला
खूस कर।
वय हरामेसा ऊच्चो अवाज लक गातो रव्हे,
काहेका तू उनको रक्सा करासेत।
अना जोन तोरो नाव को चहेतो से, तोरो मा खूसी होय।
काहेका तू पक्को च नेक लोख ला आसीस देवसेस।
ओ यहोवा आपरी दया लक तू उनला
एक मोठी ढाल लक घेरे रखजोस।
Source notes (1)
- Cross-reference रोमियो 3:13
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.