भजनसंहिता 65

परमेस्वर की स्तुति अखिन धन्यवाद

मुखिया बजानवाला गिन को लायी दाऊद को भजन, गाना

1ओ परमेस्वर, सिय्योन मा स्तुति तोरी रास्ता चोहेत,

अखिन तोरो लायी मानता पूरो करयो जाहेत।

2ओ पिराथना ला आयकन वालो!

सबरी पिरानी तोरो च जवर आहेत।

3अधरम को काम मोरो पर हावी भयो सेत;

मोरो अपराध गिन ला तू छिमा कर देजोस।

4का च धन्य से उ जोनला तू निवाड़ के

आपरो जवर आवन देवासेत,

का उ तोरो आँगन मा रव्हेत!

मी तोरो भुवन, को मन्जे तोरो पवीतर मंदिर

को साजरो-साजरो चीज लक अघाय जाहिन।

5ओ मोरो मुक्ति करनवारो परमेस्वर,

ओ धरती को सबरि दूहुर-दूहुर देस गिनको

अखिन दूहुर को समुंदर मा को रव्हन वारोगिन को सहारा,

तू धरम लक करयो हुयो भयानक

कामागिन को लक अमीला टोंड लक

मांगयो बरदान देवजोस;

6तू जोन बीरता को फेंटा कसो होतो,

आपरो ताकत लक पहाड़ीगिन ला पक्को करासे;

7तू जोन समुंदर को मोठो सबद,

वोको लहेर गिन को मोठो सबद,

अखिन देस-देस को लोखगिन को हल्ला सान्त करासे;

8एकोलायी दूहुर-दूहुर देसगिन को रव्हनवार

तोरो निसान चोवके डराय गयीन,

तू दिन उगती अना दिन बुडती दुय लक

जय जयकार करावासेत।

9तू धरती की सूधी लेयके वोला सींचासे,

तू वोला लगत फर देवनवालो करासे,

परमेस्वर को नद्दी पानी लक भरयो रव्हासे ;

तू धरती ला तियार करके

मानूसगिन को लायी अनाज ला

उपजावा सेत।

10तू वापा गिनला साजरो लक सींचासे,

अखिन उनको बीच की माती ला बसावासेत,

तू धरती ला पाऊस लक नरम करासे,

अखिन वोको उपज मा आसीस देवासे।

11आपरो भलाई लक भरयो हुया साल पर

तू मानो मुकुट ठेव देयो सेस,

तोरो रास्तागिन मा साजरो-साजरो जुनूस भेटासेत।

12जंगल को चराई गिनमा हरियाली फूट पड़यो,

अखिन पहाडीगीन खुसी को फेंटा बाँधी हुया सेत।

13चरोखर मेढ़ा-सेरीगिन को हेड़ लक भरयो हुया सेत,

अखिन किनारगिन फसल लक झकी हुया सेत,

वोय जय जयकार करासेत अखिन गावासेत।