भजनसंहिता 66

धन्यवाद-सोपनो अखिन स्तुति को गाना

मुखिया बजान वाला गिनको लायी गाना , भजन

1ओ सारो धरती को लोखहीन,

परमेस्वर को लायी जय जयकार करहो,

2वोको नाव की महीमा को भजन गाओ;

वोको स्तुति करातो हुयो वोको महीमा करो।

3परमेस्वर लक कव्हो,

तोरो काम काजक च भयानक सेत!

तोरो महासामरथ को कारन

तोरो दुस्मन तोरी चापलूसी करहेत।

4सारो धरती को लोख तोरो पाय पडहेत

अना तोरो भजन गायेत,

वोय तोरी नाव को भजन गायेत।

5आओ परमेस्वर को कामागिन ला चोवो,

वोय आपरो कामगिन को कारन मानूस गिन ला

भेव को काबिल चोवासे।

6ओना समुंदर ला सुक्को धरती कर डाकयो

वोय मोठोनदी मा लक पाय लक चलके वोनागन उतरो।

उता हमी ओको कारन खुस भयो,

7जोन आपरो बीरता लक हरामेसा सासन करासे,

अखिन आपरो डोरागिन लक राज-राज ला चोवासेत।

हठीलो आपरो डोंका नोको उभो करहे।

8ओ देस-देस को लोखहीन,

आमरो परमेस्वर ला धन्य कव्हो,

अखिन वोको स्तुति मा राग उठाव,

9जोन हमीला जिन्दो ठेवासे,

अखिन आमरो पाय ला घसरन नही देवासेत।

10काहेकि ओ परमेस्वर, तू ना हमला परखयो,

तूना अमिला खूरो को जसो तायो होतो।

11तू ना हमला जाल मा फँसायो,

अखिन आमरो कम्मर मा लगत भारी बोझा बाँधयो होतो;

12तू घुड़चढ़ा गिनला आमरो डोयीगिन को वरता लक चलायो,

हमी इस्तो अखिन पानी लक गुजरयो,

पर तूना अमिला हेड़ के सुख लक भर दियो सेस

13मी होम बली लेयके तोरो भवन मा आँहु;

मी उन वादा ला तोरो लाय पूरो करहुँ।

14जोन मीना टोन्ड उघाड़के मानयो

अखिन संकट को बेरा मा कव्हो होतो।

15मी तोला मोटो जनावर गिनको होम बली,

मेंढा गीन की चरबी ला धूप समेत चघाहुँ;

मी बकरागिन समेत बईल चघाहुँ।

16ओ परमेस्वर ला सबरि डरानवारो,

आयके, मोरो आयको, मी सांगासू

का वोना मोरो लाय काजक- काजक करयो सेस।

17मीना वोला हाक्लयो,

अना वोको च गुनानुवाद मोरो लक हुयो।

18यदि मी मन मा अनरथ को गोस्टी बिचार करतो,

तो पिरभू मोरी नही आयकतो,

19पर परमेस्वर ता आयकयो से,

वोना मोरी पिराथना को कन धियान दियो से।

20धन्य से परमेस्वर,

जोन ना मोरो पिराथना ला आयकीस,

अखीन मोरो लक अपरो करूना दूहुर नही कर दियो से!