भजनसंहिता 108

दुस्मन गिन पर खिलाप सहायता को पिराथना

(भजनसंहिता 57:7-11; 60:5-12)

दाऊद को भजन

1ओ परमेस्वर, मोरो हिरदय तोरो मा लीन से।

मी गाहुँ, मी आपरी आत्मा लक भी भजन गाहुँ।

2ओ सारंगी अना बीना जागो!

मी पटकन सक्कारी जाग उठूँ,

3हे यहोवा, मी देस-देस का लोगहुन को बीच मा तोरो धन्यवाद करहुँ,

अना राज्य-राज्य को लोगहुन को बीच मा तोरो भजन गाहुँ।

4काहेका तोरी करूना पिरेम बादल लक भी मोठी से,

अखिन तोरी सच्चाई बदलगिन लक महान से।

5ओ परमेस्वर तू सरग लक अपरी महानता ला चोवाव,

अना तोरी बड़ाई पूरी धरती पर होय!

6एकोलायी का तोरा चहेता लोख सोड़ाया जात,

आमला उत्तर दे जेको लक तोरा चहेता मुक्त करया जाय,

7परमेस्वर ना अपरी पवीतरता जघा मा कह्यो,

“मी खुस होयके सेकेम ला बांट देंहु,

अना सुक्कोत की घाटी को नाप करवाहूँ।

8गिलाद भी अना मनस्से देस भी मोरो से,

अना एपरेम मोरो डोई को टोप से, यहूदा मोरो राजदंड से।

9मोआब मोरो धोवन को बरतन से,

मी एदोम पर अपरो जुता फेखु, पलिस्तीन पर मी जय जयकार करहुं।”

10मोला सहरपना को नगर मा कोन पोंहचाहे?

एदोम तकन मोला कोन लीजाहे?

11ओ परमेस्वर का तूना अमीला नही सोड़यो?

ओ परमेस्वर, तू आमरी सेना संगा काहे नही जास?

12बैरी को बिरोध मा आमरी मदत कर,

काहेका मानूस की मदत बेकार से। 13परमेस्वर को संग होन लक आमी जीतबोन बहादुरी लक लड़बिन,

आमरो बयरी गिनला परमेस्वर कुचल्हे।