भजनसंहिता 109

कोनी मुसिबत मा फसयो मानूस कोनी सिकायत

मुखिया बजानेवाला हुन को लाय दाऊद को भजन

1ओ परमेस्वर , जेकी मी भजन बड़ाई करासू

तू उगोमुगो नोको रव्हस!

2काहेका पापी अना कपटी मानूस ना मोरो बिरोध मा टोंड उघाड़यो से,

वय मोरो बिसय मा झुट बोला सेत।

3वय बयर को बचन लक मोला चारी कन लक मोला घेर लियो से,

अना बेकार मा मोरो लक लड़ासेत।

4मोरो पिरेम को बदला वय मोरी चुगली करासेत,

पर मी ता पिराथना मा लीन रव्हासू।

5वय भलाई को बदला मा मोरो लक बुराई करयो से,

अना पिरेम को बदला मोरो लक बुराई करयो से।

6तू वोला कोनी दुस्ट अधिकारी को बस मा राख,

अना कोनी बिरोधी वोको उजोआंगन दोस लगावन को लक उभो रव्हा।

7जबा वोको नियाव करयो जाय तबा ऊ दुस्ट ठयरो,

अना वोकी पिराथना पाप मा गिनी जाय।

8वोका दिवस जरासा रव्हत

अना वोको पद ला कोनी दुसरो हिसक लेय!

9वोका लेकरु अनाथ अना

वोकी बायको बेवा भयी जाय!

10वोका लेकरु दर-दर का फिरत अना

वय आपरो बीरान घर मा लक भी हेड़ दियो जाय।

11महाजन वोको सब सोड़ाय ले,

अना परदेसी वोकी कमाई को फर ला लूट लेहेत।

12कोनी वोको पर दया करन वालो नोको रव्हा,

अना वोका अनाथ लेकरुगिन पर कोनी ला तरस नोको आवा।

13वोको बंस नास भयी जाय,

दुसरी पीढ़ी मा वोको नाव मिटाय जाय!

14वोको पुरखागिन को पाप यहोवा ला हेत रव्हा,

अना वोकी माय को पाप नोको मिटा।

15वोका पाप सदा पिरभू को सामुर रव्हत,

वोको नाव धरती मा लक मिटाय डाके।

16काहेका ऊ पापी दया करनो बिसर गयो से,

काहेका दुखी, गरीबगिन ला बेसहारा गिनला परेसान करके

उनको मंघा पड़यो रव्हत होतो। 17वोला सराप देवनो चहेतो लगत होतो,

अना ऊ सराप वोको च पर आय पड़यो,

ऊ आसीस देवन लक खुस नही होवत होतो

एकोलायी आसीरवाद वोको लक दूर रव्हा।

18ऊ कपरा घालनो जसो सराप ला घालत होतो,

अना वोको तनमा, हड्डी मा पानी अना तेल

जसो समाय गयो।

19यो वोको चारो कन गुन्डयो हुयो एक चद्दर को जसो से,

वोको कम्मर को चारीकन पट्टा को जसो लपेटो रव्हे।

20यहोवा कन लक मोरा बिरोधीगिन ला,

मोरो बिरोध मा बुरो कव्हन वाला गिनला

असोच सजा मिला।

21पर ओ पिरभू, तू मोरो तोरो नाव को जसो

मोरो लक बरताव कर,

तोरी दया ता मोठी से एकोलायी तू मोला सूटकारा दे।

22काहेका मी गरिब अना दुखी सेंऊ,

मोरो हिरदा दुखी भय गयी से।

23मी दिन बुड़न वालो सावली को जसो गायब भयी गयो।

मी टिड्डी कीड़ा जसो उड़ाय दियो गयी सेंऊ।

24उपास करत-करत मोरा टोंगरा काप रही सेत,

अना मोरी हाड़ की कमी मा सुख गयो से।

25मी लोगहुन को मजाक का हंसी को चीज बन गयी सेंऊ,

जबा वय मोला चोवासेत, तबा वय डोई हलावसेत।

26ओ मोरो परमेसवर यहोवा, मोरी मदत कर!

अपरी दया लक मोला बचायले।

27ओ परमेस्वर जेको लक वय जानासेत का यो तोरो हात को काम आय,

अना तूना च असो करयो से।

28वय मोला कोसेत भी ता तू मोला आसीरवाद देजो,

वय उठतान सरमिन्दा होत, पर तोरो दास खुस होय!

29मोरा दुस्मन गिन ला अनादर वारा कपरा पेहेरायो जाय,

अना वय अपरी हार ला कपरा जसो पेहरेत।

30मी यहोवा को धन्यवाद करहुं,

अना लगत सा लोगहुन को सभा को बीच मा वोकी मी आपरो टोन्ड लक बड़ाई करहुं।

31काहेका ऊ दुखी को उजो कन उभो रव्हे,

का वोला मौऊत की सजा लक बचाय राखेत।