भजनसंहिता 107

पाँचवाँ भाग

(भजनसंहिता 107—150)

परमेसवर को भलाई को परसंसा

1यहोवा को धन्यवाद करो, काहेका ऊ भलो से,

अना वोकी करूना सदा की से।

2यहोवा का सोड़या हुया असो च कहो,

जोनना उनला बैरीगिन को हात लक तुमला बचाय के सुड़ा लियो से।

3अना उनला देस-देस लक दिन उगती-दिनबुड़ती अना उत्तर अना दक्सिन दिसा1 कन

लक जमा करयो से।

4वय जंगल रेता को परदेस लक रास्ता मा भटकत रहीन,

अना उनला कोनी बस्ती नही मिली।

5वय भुको अना तहान होतीन अना उनको जिन्दगी खतम भयि गयो होतो।

6तबा वय गिन दुख मा यहोवा की दुहाई देईन,

अना वोना उनला लगत दुख लक सोड़ायो।

7अना उनला सीदो रास्ता, मा चलायो,

का वय कोनी बस्ती मा चली जात।

8वय लोख यहोवा करूना पिरेम को कारन, चकित कामगिन को कारन,

जोन ऊ मानूस लायी करासे, वोको वय धन्यवाद करेत।

9काहेका ऊ तहान अना भुको ला साजरी

चीजगिन लक खुस करासे।

10अना काही लोखहुन निरास मा जोन इन्धारो अना मौऊत की सावली मा, दुख मा पड़या कयदी बेडीगिन मा जकड़या दुख झेलत होतिन।

अना बसया होतिन।

11काहेका वय गिन ना परमेस्वर को बचन को बिदरोह करयो होतो,

अना उच्चो परमेसवर को सला ला बेकार समझयो।

12तबा वोना उनला जोन जगत काम लक थकजात होतीन ; वय पड़ गयीन ,

अना उनला कोनी मदत करनवारो नही मिलयो।

13तबा वय गिन ना दुख मा पिरभू ला पुकारयो,

अना वोना बिपत्ती लक बचायो।

14वोना उनला इन्धारो अना निरास लक हेड़ लियो,

अना उनको बन्धन गिनला तोड़ डाकयो।

15लोग परमेस्वर की करूना अना पिरेम चकित कामगिन को कारन,

मानूस वोको धन्यवाद करेत!

16काहेका वोना पीतल का फाटकगिन ला तोड़यो,

अना लोहो को सरीया गिनला तुकड़ा-तुकड़ा करयो।

17कछु मुरख होतिन अपरो पाप अना अधरम को

कामगिन को कारन बेझा दुखी होसेत।

18उनको सबा परकार को जेवन लक घिरना करत होतीन अना

वय मौऊत को बेसकुड़ तकन पहोच गयी होतिन।

19तबा वय दुख मा यहोवा की दुहाई देसेत,

अना ऊ उनला बिपत्ति लक बचावासे।

20ऊ अपरो वचन लक उनला साजरो करासे,

अना जोन खोदरा को कबर लक वय पड़ीसेत उनला हेड़ासे।

21लोग यहोवा की करूना, अना वोको चकित काम को कारन जोन

ऊ मानूस लायी करासे,

वोको धन्यवाद करेत।

22वय धन्यवाद की बली चघावत,

अना जय जयकार करतो हुयो वोको कामगिन को बखान करेत।

23जोन लोग समुंदर मा जहाजगिन मा चलासेत,

अना महासागर मा ब्यपार करासेत।

24वय यहोवा को कामगिन ला जोन ऊ गहेरो समुंदर मा करासे, चोवासे।

25काहेका ऊ आदेस देसे, तबा मोठो आन्धड़ आयके,

लहेर ला उठाय दियो।

26वय आकास तकन चघ जात, मंग गहराई मा उतर आवासेत,

अना दुख को मारे उनको जीव मा जीव नही रव्हा।

27वय चक्कर खासेत, अना बेवड़ा जसा होसेत

अना पूरी तरकीब बेकार भय गयी होती।

28तबा वय दुख मा यहोवा की दुहाई देसेत,

अना ऊ उनला बिपत्ती लक हेड़ासे।

29ऊ आन्धड़ ला थमाय देसे, अना लहेर रुक जासेत।

30तबा वय उनको सान्ति लक खुस होसेत,

अना ऊ उनला मन चाहयो बन्दगाह मा पोंहचाय देसे।

31लोग यहोवा की करूना पिरेम को कारन , अना चकित

कामगिन को कारन जोन मानूस लायी करासे, वोको धन्यवाद करो।

32लोगहुन की मंडली मा वोकी बेझा बड़ाई, उनला परमेस्वर को माहनता को बखान

अना मुखिया गिन की बैठक मा वोकी परसनसा करो।

33ऊ नद्दीगिन ला रेतावारो जंगल बनाय डाक से।

अना पानी बोहतो झरनो ला को सोतागिन की जाघा ला सुखाय देसे।

34ऊ उपजाउ जाघा ला खारो बंजर बनाय देसे,

असो वोमा रव्हनवाला को बुरा लोगहुन को कारन होसे।

35ऊ जंगल ला पानी को ताल अना निरजल देस

ला पानी को सोता कर देसे।

36अना वंहा ऊ भुखागिन ला बसाय देसे,

का वय बसन लाय नगर तैयार करेत।

37वय खेती करेत अना अंगूर को बाड़ी लगावत,

अना कई पिरकार का फर उगाये।

38अना ऊ उनला असो आसीरवाद देसे का वय बढ़ जात,

उनको ढ़ोर-बासरु ला घटन नही देसे।

39मंग बिपत्ति अना दुख को कारन,

वय घटके दब जासेत।

40अना ऊ सासकगिन पर अपमान की बरसात

करके बिना रास्ता को जंगल मा भटकावासे।

41ऊ दुखीगिन ला सोड़ायके ऊंचो मा ठेवासे,

अना वोको घराना ला सेरी-मेढ़ा को हेड़ जसो बढावा देसे।

42बिना कपट का न्यायी अदमी यो चोयके खुस होसेत,

बुरा लोग अपरो टोंड बंद राखासेत।

43जोन अकलवर से, ऊ येना बातगिन मा धियान करहे,

यहोवा की करूना को कामगिन मा धियान करहे।