Powari Standard Project
भजनसंहिता 106
परमेसवर को आपरो लोखहुन को परति भलाई
यहोवा की बड़ाई करो! वोको धन्यवाद करो,
काहेका ऊ भलो से; अना वोकी करूना पिरेम सदा की से।
कोन पिरभू को कामगिन को बखान कर सकासे,
कोन वोको पुरो गुनगान कर सकासे?
का धन से ऊ जोन नियाव पर चलासे,
अना हमेसा नेकी का काम करासे।
ओ यहोवा, अपरी पिरजा को लोखहुन की, मदद करजोस ता
दया को अनुसार मोला हेत कर, मोरो सूटकारा लाई मोरी सूधी ले।
का मी तोरो निवाड़ो गिन को कल्यान चोऊं,
अना तोरी पिरजा को खुसी को संग मा खुस होय जाऊ;
अना तोरो राज मा वारसान हिस्सा संग मा बड़ाई करुं।
आमी ना ता अपरा पुरखागिन जसो पाप करयो से,
अमी ना कुकरम अना बुरो करयो से।
जबा आमरो पुरखा मिसर देस मा होतिन,
तोरो चकित कामगिन मा धियान नही लगायो,
न तोरी अपार किरपा ला हेत राखयो,
वय गिन ना लाल समुंदर को जवर तोरो लक बिदरोह करयो।
तबा भी वोना अपरो नाव लायी उनला बचायो,
जोनमा अपरो महान काम ला उनला चोवाय सका।
तबा वोला लाल समुंदर ला फटकारयो अना ऊ सुक गयो;
अना ऊ उनला गहरो मा लक आपरो लोखहुन ला जंगल मा लक हेड़के आनयो।
एना पिरकार तुना उनको बैरीगिन लक बचायो,
अना दुसमन को हात लक सुड़ा लियो।
अना उनका बैरी पानी मा डुबू गयीन,
उनको मा लक एक भी नही बचयो।
तबा वय गिन ना वोको बचन को भरोसा करयो,
अना वोकी बड़ाई को गाना गावन लगीन।
पर वय झटाकनारी वोको कामगिन ला बिसर गयीन;
अना वोको जुक्ति लायी नही रुकीन।
वय गिन ना जंगल मा बेझा लालसा करयो,
अना बिनपानी को जाघा मा परमेस्वर की परीक्सा करयो।
तबा वोना उनला जोन मांगयो होतो वोच उनला दियो, माहमारी ला धाड़ देइस
पर उनको पिरान ला सुखाय दियो।
वय गिन ना छावनी मा मोसे को,
अना यहोवा को पवीतर जन हारून को बिसय म डाह करयो,
धरती फटके दातान ला घिटक लियो।
वोना अबिराम को दल ला झाक लियो
अना उनकी दल मा इस्तो भड़क उठी;
अना दुस्ट लोग आँच लक भस्म होय गयो।
वय गिन ना होरेब मा बछड़ा बनायो,
अना बनयो हुयी मुरती को पूजा करयो।
वय गिन ना परमेसवर की बड़ाई, को घास
खानवालो बइल की मुरती मा बदल डाकयो।
वय अपरो मुक्ति दाता परमेस्वर ला बिसार गयात,
जेना मिसर मा मोठा-मोठा काम करयो होतो।
वोना ता हाम को देस मा चकित कामगिन अना
लाल समुंदर को किनार मा भंयकर काम करयो होतिन।
एकोलायी वोना कह्यो का मी इनला सत्यानास कर डाकू
अदि मोरो चुनयो हुयो दास मोसे जोखिम को जाघा मा उनको लायी उभो नही होतो,
जोनना मोरी जलजलाहट ला थंडो करो
कही असो ना होय का मी उनला नास कर डाकु।
वय गिनना मनभावनो देस ला निक्कमा जानयो,
अना वोको वचन पर भरोसा नही करयो।
वय अपरो तम्बुगिन मा बड़बड़ाय अना यहोवा को कह्यो नही मानयो।
तबा वोना उनको बिसय मा कसम खायो का मी इनला जंगल मा नास करहुं।
अना इनको वंस ला दुसरी जाति को सामुर पाड़ देहुं,
अना देस-देस ला तितर-बितर करहुं।
वय बालपोर देवता ला पुजन लगीन अना मुरदागिन ला चघायो
हुयो बली को मांस खावन लगीन।
असो उनना अपरो काम लक वोला गुस्सा देवायो, अना मरही उनमा फूट पड़ी।
तबा पीनहास ना उभो होयके नियाव को दंड दियो, जेको लक मरही थम गयी।
अना यो वोकी लेख पीढ़ी लक पीढ़ी तकन हरमेसा
को लाय न्यायीपन गिनयो गयो।
उनना मरीबा को सोतो को झरनो को जवर भी यहोवा को गुस्सा ला भड़कायीन,
अना उनको कारन मोसे ला संकट मा पड़ गयो।
काहेका उनना वोकी आत्मा लक बिदरोह करिन,
तबा मोसे बिना बिचार को बोल ऊठयो।
परमेस्वर लोगहुन को बारे मा उनना हुकुम दियो होतो,
उनला वोना सत्यानास नही कियो,
मंग वोना राज गिन लक हिलमिल गयीन,
अना उनको ब्यौहार ला सीक गयीन;
अखिन उनकी मूरतगिन को पूजा सेवा करन लगीन,
अखिन वय उनको लाय विनास को फन्दा बन गयीन।
मंग उनना आपरी टुरा-टुरीगिन ला
भूत-पिरेत गिन को लाय बलिदान करीन;
अना आपरो निरदोस टुरा-टुरीगिन को खून बहायीन।
जिनला उनना कनान देस को मूरतगिन पर बलि कियो,
एकोलाय देस खून लक अपवीतर होय गयो।
अना वय आपच आपरो छिनाला पन को कारन भिरस्ट होय गयीन,
अना आपरो काजगिन को कारन व्यभिचारी भी बन गयीन।
तबा यहोवा को गुस्सा आपरी पिरजा मा भड़कयो,
अखिन वोला आपरो निज हिस्सा वारीसपन लक घीन आयी;
तबा वोना उनला बेगरो राज को हातगिनमा बस मा कर दियो,
अना उनको दुस्मनगिन ना उन पर राज करिन।
उनको दुस्मन ना उनको पर अत्याचार करिन,
अखिन वय उनको हातगिन को खाल्या दब गयीन।
लगत गन वोना उनला सुड़ायो,
मंग वय वोको बिरुध्द बलवा करत गयीन,
अखिन आपरो पाप को कारन दबत गयीन।
मंग भी जबा-जबा उनको चिल्लावनो कान मा पड़िन,
तबा-तबा वोना उनको संकट पर चोयो!
अना उनको हित मा आपरी करार ला हेत करकेना
आपरी अपार करूना को जसो तरस खायो,
अखिन उन सब ला जोन उनला बन्दी करके लेय गयीन होतिन
उन सबा लक उन पर दया करवायीन।
ओ आमरो परमेस्वर यहोवा, अमीला बचाव,
अखिन आमी ला बेगरी राज-राज को लोखहुन को बिच मा लक जमा कर लेय,
का आमी तोरो पवीतर नाव को धन्यवाद करबीन,
अना तोरी स्तुति करत हुयो तोरो बारे मा बड़ाई करबीन।
इसरायल को परमेस्वर यहोवा
अनादिकाल लक अनन्तकाल तकन धन्य से!
अना सप्पा पिरजा मो लोखहुन कव्ह “असो होहे! ”
यहोवा को स्तुति करो। आमीन
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.