भजनसंहिता 105

परमेसवर अना वोका लोग

(1 इतिहास 16:8-22)

1यहोवा को धन्यवाद करो अना वोको लक पिराथना करो,

देस-देस का लोगहुन मा वोको मोठो काज गिनला सांगो।

2वोको लाय गाना अना भजन गावो,

वोको सब चकित कामगिन को बखान करो।

3वोको पवीतर नाव की बड़ाई करो;

यहोवा ला ढुंढन वारागिन को हिरदा खुस होय।

4यहोवा अना वोकी ताकत ला खोजो,

वोको दरसन लाय हमेसा खोजी बनया रव्हो।

5वोका चकित कामगिन ला हेत करो,

वोका चमत्कार अना फैसला हेत करो।

6ओ वोको सेवक अबराहम को बंस,

ओ याकूब की सन्तान तुमी वोका निवाड़या हुया सेव।

7ऊ च आमरो परमेसवर यहोवा से,

धरती भर मा वोको नियाय होसे।

8ऊ अपरो बचन ला हमेसा हेत ठेवासे।

यो करार ला हजारो पीढीगीन को लाय राखयो से।

9वाच वाचा जोन वोना अबराहम संगा बान्धयो होतो,

अना वोको बिसय मा वोना इसहाक लक कसम खायो होतो।

10अखिन वोना च याकूब लाय बिधि करके,

इसराइल को लाय यो कहके

सदा लाई करार ला पिक्को करयो।

11“मी कनान देस तोला च देहुं,

ऊ बटवारो मा तुमरो हिस्सा होहे।”

12वोना बेरा ता वय गिनती मा जरा सा होतिन,

अखिन वंहान परदेसी होतिन।

13वय एक राज लक दुसरी राज मा,

अना एक देस लक दुसरो देस मा फिरत होतिन।

14पर वोना कोनी मानूस ला वोको पर अत्याचार नही करन दियो।

अना ऊ राजा गिनला उनको लाय लाताड़त देत होतो,

15“मोरा अभिसिक्तगिन ला नोको छिवो,

अना मोरो भविस्यवक्ता गिन की हानि नोको करो।”

16मंग वोना ऊ देस मा गिरानी धाड़यो,

अना अनाज को सब रास्ता बंद कर डाकयो।

17वोना यूसूफ नाव को एक अदमी ला उनको लक पुढ़ो धाड़यो होतो,

जोन दास होवन लायी बिकयो गयो होतो।

18लोग गिन ना वोको पाय मा बेडी डाक के वोला दुख दियो;

वोला गरो मा लोहो की संकली लक जक़डयो गयो।

19जबा तकन वोकी गोस्टी पूरी नही भयी,

तबा तकन यहोवा बचन वोला कसोटी मा कसतो रहयो।

20तबा राजा ना दुत धाड़के वोला हिटवाय दियो,

अना देस-देस का सासकगिन ना वोका बन्धन खुलवाय दियो।

21वोना वोला अपरो घराना को मालीक अना

अपरी पूरी सम्पति को सासक बनाय दियो।

22का ऊ वोको अधिकारी ला इक्सा को अनुसार आदेस दे,

अना वोको मुखिया गिनला गियान सिखाये,

23मंग इसराइली मिसर मा आयो,

अना याकूब हाम को परदेस मा रहयो।

24पिरभू ना अपरी पिरजा को लोकहुन ला लगत सी कर दियो,

अना उनको दुसमनगिन लक जादा ताकतवर कर दियो।

25वोना मिसरीगिन को मन ला असो फिराय दियो,

का वय वोकी पिरजा को लोखहुन लक बैर अना

वोको सेवकगिन लक छल करन लगीन।

26वोना अपरो सेवक मोसे ला,

अना निवाड़यो हुयो हारून ला धाड़यो।

27उनना उनको बीच वोको कनलक लगत तरीका लक निसान अना हाम देस मा चमतकार दिसायो।

28वोना इन्धरो करयो, अना इन्धारो भय गयो,

अना उन ना वोकी बात नही मानयो, अना बलवा करयो।

29वोना मिसरीगिन को पानी ला रकत मा बदल दियो,

अना मसरीगिन ला मार डाकयो।

30उनको देस अना उनको राजा गिनका

महेल भी मेन्डका गिन लक भर गयीन।

31पिरभू ना आदेस दियो अना उनको

पुरो देस मा माखी- टिड्डी आय गयीन।

32वोना उनको लाय पानी को बदला मा गारगोटा,

अना देस मा बिजली इस्तो जसो बरसायो।

33पिरभू ना उनको अंगूर को बगीचा अना अँजीर को झाड़गिन ला,

उनको देस का सब झाड़गिन ला उखाड़ के फेक दियो।

34वोना आदेस दियो तबा टिड्डी अना कीड़ा बेगिनती का आय गयीन।

35अना वय गिन ना उनको देस को अनाज अना खावन की चीजगिन ला खाय डाकयो;

उनकी जाघा को सब फलगिन ला भी चट कर डाकयो।

36पिरभू ना उनको मिसर देस को सब परिवार पहेलोटा टुरा गिनला मार ड़ाकयो ,

37तबा ऊ इसराइल कुल ला सोन्नो-खूरो देयके हेड़ आनयो,

अना उनको मा लक कोनी निरबल नहोतो।

38उनको जान लक मिसरी खुस भयीन,

काहेका उनको डर उनको मा समाय गयो होतो।

39वोना सावली लायी बादर फौलायो,

अना रात मा उजाड़ो करन लायी इस्तो दियो।

40वय गिन ना मांगयो तबा वोना बटेर गिनला पोंहचायो,

अना उनला सरग को रोटी लक सान्त करयो।

41वोना चट्टान फाडयो तबा पानी बोहन लगयो,

अना निरजल जाघा मा नद्दी मा बोहन लगी।

42काहेका वोन आपरो पवीतर बचन अना

अपरो सेवक अबराहम ला हेत करयो।

43ऊ अपरी पिरजा का लोखहुन लक खुस करके,

अना अपरा चुनया हुयागिन ला

जय जयकार करावत हेड़ आनयो।

44अना उनला राज-राज को जमीन दियो,

अना उनला दुसरो को मेहनत को दाम को अधिकारी बना दियो।

45का वय वोकी नियम गिन ला मानत,

अना वोको नेम ला पुरो करत। यहोवा की बड़ाई करो!