भजनसंहिता 104

जगत बनान वालो की स्तुति

1ओ मोरी मन , तू यहोवा ला धन्य कव्ह!

ओ मोरो परमेस्वर यहोवा , तू लगत महान से!

तू वैभव अखिन ऐसवर को कपरा घालयो हुयो से,

2जोन उजेला गिनला चद्दर को जसो पघारो रव्हासे।

अखिन बादल ला तंबू को जसो तानो रव्हासे।

3जोन आपरो अटारी गिनको कड़ीगिन पानी मा धरासे ,

अखिन बद्दल गिनला आपरो रथ बनावासे ,

अखिन वारा को पंखा गिनमा चलासे ,

4जोन वारा गिनला आपरो खबरी दूत ,

अखिन धड़कासे इस्तो ला आपरो सेवक बनावासे।

5तूना धरती ला वोकी पाया मा अटल कियो से,

जोनलक वो कभ्भू नोको डगमगाए।

6तू वोला गहेरो सागर लक झाक देयो से,

जसो कपरा लक पानी पहाड़ीगिन को वरता थम गयी

7तोरी फटकार लक वोय पराय गयो

; तोरो गरजन को सब्द आयकत च उ लहाकी करके बोह गयी।

8वा वोय पहाड़ीगिन पर चघ गयो,

अखिन दुई पहाड़ी को घोन्दी को रास्ता लक

वोना जघा मा उतर गयो, जोनला तू

वोको लाय तय्यार करयो होतो।

9तू एक हद ठयरायो जोनला उ नहि नक सकासेत,

अखिन लवट के जमिन ला झाक सकासेत।

10तू ओघर गिनमा पानी को पिझरा बोहावासे,

वोय पहाड़ीगिन को बीच लक बोहासेत।

11उनमा लक बर्रा को सबरी जीव - जन्तु पानी पीवासेत

जगंली गाढव भी आपरो तहान बुझा ले से।

12उनको जवर बादर को पक्सी आय के बसेरो करासेत ,

अखिन डगाली अना पान गिनको बीच मा लक बोलासेत .

13तू आपरो अटारी गिनमा लक पहाड़ी गिनला सींचासे

तोरी काम गिनकी फर लक धरती अघा जावासे।

14तू जनावर गिनको लायी गवथ ,

अखिन मानूस गिनको काम को लाय अनाज अखिन चीज उपजावासे।

अखिन यो रीति धरती लक उ जेवन को जुनूस गिन पैदा करासे।

15अखिन अंगूर को रस जोन लक मानूस की मन खुस होवासे,

अखिन तेल जोन लक उनको वोय चहेरा चमकासे।

अखिन अनाज जोन लक वोय सम्भल जावासे।

16यहोवा की झाड़ सानत रव्हासे मजे

लबानोन को देवदार जोन वोकोच लगयो हुया सेत। .

17वोमा चिड़िया गिन आपरो गोधा बनावासेत। गलगल को बसेरो सनौवर को झाड़गिन मा होवा सेत।

18ऊँचो पहाड़ी जगंली बकरा गिनको लाय से। जी

अखिन चटानगिन बिज्जू जनावर को सरन को जघा मा से।

19वोना ठयरायो बेरा गिनको लाय चन्दा ला बनायो से।

दिन आपरो बुड़न को बेरा जानासेत।

20तू इन्धयारो करासे , तबा राती भयी जासे।

जोन मा जंगल को सबरी जीव - जन्तु हिन्डतो रव्हासेत।

21जुवान सेर सीकार को लायी गरजासेत ,

अखिन पिरभू लक आपरो जेवन माँगासेत।

22दिन हिटतो बेरा च वोय चली जावा सेत

अखिन आपरो गुफा गिनमा जाके बसासे।

23तबा मानूस आपरो काम को लायी ,

अखिन सन्जा तकन मेहनत करन को लाय हिटासे।

24ओ यहोवा , तोरो काम बेगिनती से!

इन सबरी जुनूस गिनला तू अक्कल लक बनायो से।

25योच पिरकार समुंदर मोठो अखिन लगत च चवडो , से।

अखिन वोमा बेगीनती पानी को जन्तु , का नाहनो , का मोठो भरयो पड़यो सेत।

26वोको मा जहाज भी आवनो-जावनो करासेत।

अखिन पानी मा रव्हन वारो जीव (जलीय जीव-जन्तु )भी जोनला तूना उता खेल को लायी बनायो से।

27इन सबला तोरोच आसरा से,

का तू उनला बेरा पर दियो करे।

28तू उनला देवासेत अना वोय जेवन लेलेव सेत लेवासेत।

तू आपरो मुठ्ठा उघाड़ से अना साजरो चीज लक अघाय देवासेत।

29तू चहेरा फेर लेवासेत , अखिन वोय घबराय जावासेत।

तू उनला सास ले लेवा सेत। अखिन उनको पिरान सूट जावासेत,

अखिन माटी मा मग मिल जावासेत।

30मग तू आपरो कन लक जीवन को सास धाड़ासे,

अखिन वोय बनायो जावासेत, अखिन तू धरती ला नवतो कर देवा से।

31यहोवा की महीमा हमेसा काल तक बनयो रव्हे,

यहोवा आपरो कामागिन लक खुस होवे!

32वोको निघा लक च धरती कपनो लगासेत,

अखिन वोको छिवनो लक च पहाड़ीगिन लक धूंगा हिटासे।

33मी जिन्दगी भर यहोवा को गाना गावतो रव्हु

जबा तकन मी बनयो रव्हु तबा तकन आपरो परमेस्वर को भजन गावतो रव्हु।

34मोरो धियान मनन करनो वोला चहेतो लगे ,

काहेकि मी त यहोवा को कारन खुस रव्हू।

35पापी लोख धरती पर लक नास भयी जाबिन ,

अखिन दुस्ट लोख पुढ़ो को नोको रव्ह! ओ मोरी मन , यहोवा ला धन्य कव्ह! यहोवा की स्तुति करे1!