भजनसंहिता 103

परमेस्वर को पिरेम

दाऊद को भजन

1ओ मोरो मन, यहोवा ला धन्य कव्ह;

अना जोन काही मोरो मा से,

उ वोको पवीतर नाव ला धन्य कव्ह!

2ओ मोरो मन, यहोवा को नाव ला धन्य कव्ह,

अना वोको उपकार ला नोको बिसर।

3वोच ता तोरो सबच अधरम ला छिमा करासेत।

अना तोरो सबा रोग गिनला साजरो करासे,

4वोच तो तोरो पिरान ला नास होवनो लक सुड़ा लेवासे।

अना तोरो डोसकी मा करूना अना दया को मुकुट बाधँ से,

5वोच तो तोला सब साजरी चीज लक अघाय देवासे।

जोनलक तोरो जुवानी गरूड़ को जसी भयी जासेत।

6यहोवा सबरी सतायो हुवो को लाय

धरम अखीन न्याय को काम करासे।

7वोना मोसे ला आपरी मारग,

अना इसरायल गिनमा आपरो काज ला पिरकट कियो।

8यहोवा दयालु अना किरपा करनवारो,

देर लक गुस्सा करन वालो अना बेजा दयामय से।

9वय हर हमेसा विवाद नही करहेत,

नही वोको गुस्सा हमेसा को लाय भड़कयो रव्हे।

10वोना आमरो पाप गिनको अनुसार

आमी लक गलत ब्यौहार नही कियो,

अना नही आमरो अपराध को काजगिन को

जसो आमला बदला लियो से।

11जसो बादर धरती को वरता उच्चो से ,

वसो च वोको करूना वोको डरवैया को वरता परबल से

12दिन उगन को जघा लक दिन बुड़न को जघा जेतरो दूहुर से

वोना आमरो अपराध गिनला आमरो लक उतरो च दूहुर कर देयो से।

13जसो अजी आपरो बालकगिन पर दया करासे ,

वसो च यहोवा आपरो डरवैया पर दया करासे।

14काहेकि उ आमरो सिरस्टि जानासे ;

अखिन वोला हेत रव्हासे का मानूस माटी1 च से।

15मानूस की उमर गवथ को जसी होवासेत ,

हमी जंगल फूल को जसो बढत अना फूलत अना फरसेत ,

16जोन वारा लग च थम नही सकासेत।

अखिन न वोय आपरो जघा मा मग भेटासे। .

17पर यहोवा की करूना उसकी डरवैया पर जुग-जुग,

अखिन वोको न्यायपन वोको नाती - पन्ति पर भी पिरगट हो से।

18मजे वोको पर जोन वोको करार को पालन करतो

अखीन वोको उपदेस ला हेत करतो वोको पर चलासे।

19यहोवा तो आपरो सिंघासन सरग मा अटल कियो से।

अखीन वोको राज पूरो सिरस्टि पर से।

20ओ यहोवा को दूतगिन, तुम जोन मोठों ताकतवर सेव,

अना वोको बचन ला मानासो अना पूरो करासेव

वोकी स्तूती करहो!

21ओ यहोवा को सारी सेना गिन, ओ वोको सेवकगिन,

तुम जोन वोकी मनसा पूरी करासेव, वोकी स्तूती करहो!

22ओ यहोवा को सप्पा संसार,

वोको राज्य को सबा जाघा मा वोकी स्तूती करहो!

ओ मोरो मन, तू यहोवा की वोकी स्तुति करहो!