भजनसंहिता 102

संकट मा पड़यो जुवान को पिराथना

गरीब जन को वा बेरा को पिराथना जबा उ दु ख की मारयो आपरो सोक को गोस्टि यहोवा को समोर खोल के कव्हासेत

1हे यहोवा , मोरो पिराथना आयक ,

मोरो दोहाई तोरो तकन पोहचेत!

2मोरो संकट को दिवस आपरो चहेरा मोरो लक

नोको लुकाय!

आपरो कान मोरो कन लगाव!

जोन बेरा मी हाकलू , वोच बेरा लवकर लक मोरो आयक ले

3काहेकि मोरो दिवस धूंगा गिनको जसो,

उड़ जावासेत , अखिन मोरो हाड़ गिन

इस्तो को जसी जर गयी सेती।

4मोरो मन झुलसो हुयो गवथ कि जसी

सूक गयो सेस अखिन मी आपरो

जेवनो बिसर जावासू।

5कुन्हावतो-कुन्हावतो मोरो आँग

चमडा हाड़ गिनमा सट गयो से।

6मी जंगल को घुबड़ को बरोबर भयी गयो सेव ,

मी बिरान जघा गिनको घुबड़ को जसो बन गयो सेव।

7मी पड़यो- पड़यो जगतो रव्हासू अखिन

एखलो चिड़ी गिनको जसो भयी गयो सेव,

जोन छप्पर को वरता ऐखलो बसासे।

8मोरो दुस्मन लगातार मोरो नावधराई करासेत ,

जोन मोरो बिरोध की धुन मा बयताड़ होय रह्यो सेत।

वोय मोरो नाव लेव क किरिया खायासेत।

9काहेकि मी भाकर को जसो राखड़ खायो

अखिन आँसू मिलयो पानी पीवसू।

10यो तोरो किरोद अखिन कोप को कारन हुयो से।

काहेकि तूना मोला उठायो,

अखिन मंग फेंक देयो सेस।

11मोरो उमर ढ़लतो हुयो सावली को जसो से।

अखिन मी खुद गवथ को जसो सूकन लगयो सेऊ।

12पर ओ यहोवा , तू हमेसा को लाय विराजमान रव्हजोस

अखिन जोन नाव लक तोरो हेत होवा से ,

वोय पीढी लक पीढी तकन बनयो रव्हेत।

13तू उभो होयके सिय्योन पर दया करजोस ;

काहेकि वोको पर किरपा करन को

ठयरायो हुयो साल को बेरा आय गयो से।

14काहेकि तोरो नवकर वोको गोटा गिनला चहावासेत ,

अखिन वोय धुल्ला पर दया खायासेत।

15एकोलायी राज-राज यहोवा की नाव को भेव मानेत।

अखिन धरती को सबरी राजा तोरो महीमा परताप लक डरहेत।

16काहेकि यहोवा न सिय्योन ला मंग बसयो सेस

अखिन उ आपरो महीमा को संग चोवासे।

17उ लचार को पिराथना को कन टोंड करासे ,

अखिन वोको पिराथना ला बेकार नही जानासे।

18यो गोस्टि आवनवारो पीढी को लाय लिख्यो जाहेत।

अखिन एक अना आब तकन राज जोन बनायो जाहेत वोच

यहोवा की स्तुति करेत।

19काहेकि यहोवा न आपरो ऊच्चो अखिन

पवीतर जघा लक निघा करके सरग लक धरती को कन चोयो।

20जोन लक बन्दीगिन को कलाहरनो आयके,

अखिन घात होनवाली गिनको बन्धन उघाडे। जोला मरन को सजा दियो गयो से।

21अखिन सिय्योन नगर मा यहोवा की नाव को

बखान कियो जाय!

अखिन येरूसलेम मा वोको स्तुति कियो जाय!

22यो वोना बेरा होहे जबा देस- देस ,

अखिन राज्य-राज्य को लोख यहोवा को सेवा

पूजा करन को लाय जमा होहेत।

23वोना मोला जिन्दगी को यातरा मा दुख देयके,जुवानी मा

मोरी ताकत अखिन उमर ला घटायो।

24मी कह्यो , ओ मोरो पिरभू ,मोला अरधो उमर मा नोको उठाय!

तोरो साल पीढी लक पीढी तकन बनो रव्हेत।

25सनातन मा तूना धरती की पाया ड़ाकयो ,

अखिन बादल तोरो हात गिनको बनायो हुयो से।

26वा तो नास होहे , पर तू बनयो रव्हजोस;

अखिन वोय सबरी कपरा को जसो जूनो भयी जाहेती

तू उनला कपरा को जसो बदलजोस ,

अखिन वोय बदल जाहेत

27पर तू वोच आस, अखिन तोरो साल गिनकी आखरी नहात।

28तोरो नवकरगिन को औवलाद बनयो रव्हेत,

अखिन उनको बंस तोरो समोर अटल रव्हेत।