भजनसंहिता 84

परमेस्वर को भवन को चाह

परधान बजानवालो को लय गित्तीथ मा कोरह बंसी गिन को भजन

1ओ सेनाहीन को यहोवा, तोरो रव्हन को जाघा कितरो पियारो से!

2मोरो पिरान यहोवा को आँगन गिनको चाहा करत-करत बेहोस होय चलयो से;

मोरो तन मन दोंनो जीवतो परमेस्वर ला हाकलो सेत।

3होय सेनाहीन को यहोवा, होय मोरो राजा, अना मोरो परमेस्वर, तोरी बेदी गिनमा चिडिया ना आपरो बसेरा

अना सुपाबेनी ना घोंसला बनाय लियो से जेमा वोय आपरा लेकरा ला राखे।

4का च धन्य से, वय जोन तोरो भवन मा रव्हत सेत;

वोय तोरी स्तुति हर हमेसा करत रहेतिन।

5का ही धन्य से, ऊ मानूस जोन तोरो लक ताकत पायो से,

अना वोय जेनला को सिय्योन को पहाड़ी पवीतर यतरा करन लय उतसुक सेत।

6वोय बाका को किनार1 मा जावत हुयो वोको झरना को जाघा बनावत सेत;

मंग बरसात को पहेलो बरसात वोको मा आसीस च आसीस उपजावासेत।

7वय ताकत मा ताकत पावासेत।2

वोमा लक हरेक जन सिय्योन मा परमेस्वर ला आपरो टोन्ड चोवाहे।

8हे सबले मोठो ताकतवर पिरभू , मोरी पिराथना आयक,

होय याकूब को परमेस्वर, कान लगाय!

9होय मोरो परमेस्वर, होय आमरी ढाल, मा निगाह कर;

अना आपरो अभिसिक्त को टोन्ड चोव!

10काहेका तोरो आँगन मा एक दिवस अना किता का हजार दिवस लक साजरो से।

दुसमन को डेरागिन मा रव्हन लक

आपरो परमेस्वर को घर मा ऊभो रव्हनो च मोला साजरो लग से।

11काहेका यहोवा परमेस्वर खरो अना ढाल से;

यहोवा दया करहे, अना महीमा देहे;

अना जोन लोग साजरो चाल चलसेत;

उन लक ऊ कोईच साजरो सामाएन राख ना सोड़हे।3

12होय सेनाहीन को यहोवा,

का ही धन्य ऊ मानूस से, जोन तोरो पर भरोसा राखत सेत!