भजनसंहिता 85

रास्ट को कल्यान को लाय पिराथना

परधान बजानवालो को लाय: कोरहबन्सीगिन को भजन

1ओ यहोवा, तू आपरो देस पर खुस हुयो,

याकूब ला गुलामी लक लवटा ले आयो से।

2तूना आपरो पिरजा को पाप ला माफ करयो से;

अना वोको सप्पा पापगिन ला छुपाय दियो से।

3तूना आपरो गुस्सा ला सानत कियो से;

अना आपरो भड़कयो हुयो गुस्सा ला दूहुर कियो से।

4ओ आमरो मुक्तिदाता परमेस्वर, आमला मंग बनाय,

अना आपरो गुस्सा हमी लक दुहुर कर! 1

5का तू हमेसा आमी पर नाराज हुयो रहेत?

का तू पीढ़ी लक पीढ़ी तकन गुस्सा करत हुयो रहेत?

6का तू आमला मंग नहि जिलाहे,

का तोरी पिरजा तोरो मा खुसी मनाये?

7होय यहोवा आपरी पिरेम अना दया आमला चोवाय,

अखिन आमला सुड़ाय ले।

8मी कान लगाय रहूँ का परमेस्वर यहोवा का कव्ह से,

ऊ ता आपरी पिरजा लक जोन वोका सेवक लोख सेत, सांती को गोस्टी कहेत;

मंग वय पलट के मूरखता नोको करन लगेत।

9यकिन से का वोका डरन वालो ला सुड़ावन को बेरा जवर से,2

तबा आमरो देस मा महीमा को बास होहे।

10दया अखिन सच्चाई सांग मा मिलयो रव्हे;

न्यायीपन अना सांती ना आपस मा चुम्बन कियो सेत।

11भरोसा जोग धरती मा लक हिट से

न्याय पन सरग लक चोव से।

12हव, यहोवा अमिला साजरो बनाय देहे,

अखिन आमरी माती मा उपज देहे।

13धरम वोको पुढ़ो-पुढ़ो चलहे,

अखिन वोको पाय को निसान ला आमरो लाय रास्ता बनाहे।