Powari Standard Project
भजनसंहिता 78
परमेस्वर अना वोका लोग
आसाप को मस्कील
ओ, मोरा लोगगिन, मोरी सिक्सा आयको;
मोरो नियम गिन को कन कान लगावो!
मी आपरो टोन्ड दस्टांत सांगन को लाय उघाडु1
मी जूनो जमाना को लुकयो गोस्टि कव्हूँ,
जोन गोस्टी ला आमीना आयकया, अना जान लियो,
अना आमरो बाप- दादा गिनना आमी लक जिकर किया सेत।
उनला आमी वोकी औलाद गिन लक छीपाय के नोको राखे,
मंग होनहार पीढ़ी का लोगहुन लक,
यहोवा का बडाई अना वोकी ताकत,
अना चमतकार गिन को जिकर करबोन।
वोना तो याकूब मा एक चितोनी ठयरायी,
अना इसरायल मा एक कानून चलायो,
जेको बारे मा वोना आमरो पितर गिन ला हुकुम दियो,
का तुमी इनला आपरो-आपरो टुरा-टारी गिन ला सांगो;
का आवन वालो पीढ़ी का लोग, मतलब जोन बच्चा पैयदा होवन वाला सेत, वय इनला जाने;
अना आपरो-आपरो टुरा-टारी गिन ला बखान कर साजरो लक सांगे।
जेन लक वोय परमेस्वर मा भरोसा राखे, परमेस्वर को मोठो काजगिन ला नोको बिसरेत,
पर वोको हुकुम को पालन करत रव्हेत,
अना आपरो पितरो को जसो नोको होय,
काहेका वो पीढ़ी का लोख ता हठीलो अना बलवा करन वालो होतिन,
अना उनना आपरो मन अटल नोको कियो होतिन,
अना उनकी आत्मा परमेस्वर को कन खरो नहि रह्यो।
एपरेम गिनना ता सस्तर धारी अना धनुस धारी होवन पर भी,
लड़ाई को बेरा पाठ चोवाय दियो।
उनना परमेस्वर को वादा पूरो नहि कियो,
अना वोको कानून पर चलन लाय नकार देयिन।
उनना वोको मोठा काजगिन ला अना जो चमतकार वोना उनको सामुर कियो होतिन,
उनला बिसर देयीन।
वोना तो उनको बाप-दादागिन को सामुर मिसर देस ला सोअन को बर्रा मा अदभूद करम किया होतिन।
वोना समूदर ला दुई हिस्सा करके उनला पार करा दियो,
अना पानी ला ढिग को जसो ऊभो कर दियो।
वोना दिवस ला बादर को खम्मा लक,
अना पुरो राती स्तो को उजाड़ो लक उनको अगुवाई कियो होतो।
उ रेतागिन को जंगल मा चट्टान ला फाड़के,
उनला अथाह झरना लक नद्दी जसी पानी हेड़यो अना पिलायो होतो।
वोना चट्टान लक भी धार हेड़यो ,
अना नद्दीगिन को जसी पानी बहायो।
तबा भी वोय मंग वोको बिदरोह अखिन पाप करत गयीन,
अना रेताको देस मा परम परधान को बिरूद करत रहिन।
अना आपरी चाह को जसो जेवन माँगके मन च मन मा परमेस्वर को परीक्सा करिन।
वोय परमेस्वर को बिरूद कहिन,
अना कव्हन लगीन, “का परमेस्वर रेगीस्तान मा खाना को बेवस्था कर सकासे?
वोना चट्टान मा मारके पानी ला बोहाय ता दियो,
अना धारागिन उमड़ चलीन। अना उ भाकरी को जुगाड़ कर
का ऊ आपरी परजा को लाय माँस ला तैयार कर सकासे”?
यहोवा आयके गुस्सो लक भर गयो,
तबा याकूब को बिरूद ऊ आग बबुला होय उठयो,
अना इसरायल को बिरूद गुस्सा भड़कयो;
एकोलाय का उनना परमेस्वर मा भरोसा नहि राख्या होतिन,
ना वोकी उध्दार करन को ताकत मा भरोसा करिन।
तबा भी वोना बादर ला हुकुम दियो,
अखिन सरग का दरवाजा ला खोल्यो;
अना उनला जेवन को लाय मन्ना बरसायो,
अना उनला सरग को अनाज दियो।
मानूसगिन ला सरगदूत को भाकर भेटयो,
वोना उनला मनमानी जेवन दियो।
वोना बादर मा पूरब को वारा ला चलायो,
अखिन आपरी ताकत लक दक्सिन गिन वारा बहायो;
अना उनको लाय माँस धूल-कन को जसो बेझा बरसायो,
अना समूदर को रेत को जसो बेझा सारा पक्सी भेजयो;
अना उनकी छावनी को बीच मा,
उनको रव्हन कि जाघा को चारिकन पाड़यो।
अखिन वोय खायके बेझा सन्तुस्ट हुयीन,
अना वोना उनकी मनोकामना पुरो कियो।
उनको मनोकामना बनयो हि रह्यो,
उनको जेवन उनको टोन्ड मा ही होतो,
का परमेस्वर को गुस्सा उन पर भड़कयो,
अखिन वोना उनको हस्ट-पुस्ट बदन ला मारयो,
अना इसरायल का जवानगिन ला पाड़ दियो।
एतरो मा भी वय अखिन बेझा पाप करत गयीन;
अना परमेस्वर को चमतकारगिन मा भरोसा नहि करिन।
तबा वोना उनको बे काम दिवस मा,
अना उनका सालगिन ला घबरावट मा कटवायो।
जबा ऊ उनला मारत होतो2 तबा वोय वोला पूसत होतिन;
मंग परमेस्वर ला जियान लक ढुँढत होतिन।
उनला हेत होवत होतो का परमेस्वर आमरी चट्टान से,
अना परम परधान परमेस्वर आमरो सुड़ावन वालो से,
तबा भी उन टोंड लक ना वोकी चापलूसी करिन;
वोय वोको लक खोटो बोलीन।
परमेस्वर उनको हिरदय वोकी अवर मजबूत नहि होतो,
नहि वोय वोकी करार को बारे मा खरो होतिन।
मंग वोय जो दयालु आय, ऊ अधरम को ढाँक से, अना नास नहि करसे;
ऊ बार-बार आपरो गुस्सा ला ठंडो करसे,
अखिन आपरो जलजलाहट ला पूरो रीति लक भड़कन नहि देय।
वोला हेत हुयो का यो नासबान से,
यो वारा को जसो से जो चली जावसे अना लवटके नहि आवासे।
उन ना केतरो च बार मरु जमीनमा वोको पर हावी हुयीन।
अखिन मरु जमीन मा वोला नरबस करयो!
वोय बार-बार पवीतर परमेस्वर को परिक्सा करत होतिन,
अना इसरायल ला पसतावा करत होतिन।
उनना ना वोको भुजबल ला याद करिन,
नहि वो दिवस जबा वोना उनला दुस्मन को चुंगुल लक सोडायो होतो;
का वोना कसो आपरो निसान मिसर देस मा,
अखिन आपरो चमतकार सोअन को छेतर मा करयो होतो,
वोना तो मिसरगिन को नद्दीगिन को खून बनाय डालयो,
अना वोय आपरी नद्दीगिन को पानी ला पीब नहि सके,
वोना उनको बीचमा डांस धाड़यो जोनना उनला काप खायो,
अखीन मेन्डका भी धाड़यो जोन ना उनको बिगाड़ करयो।
वोना उनको जमीन को उपज कीड़ा ,
अखीन उनको खेतीबारी ला टिड्डी गिनला खिला दियो होतो।
वोना वोको अंगूर की बेला ला गारगोटी लक
अखीन उनको चिनार को झाड़ ला गारगोटा बरसाके नास कियो।
वोना उनको जनावर ला गारगोटा लक
अखीन उनके ढोर गिनला बिजलीगिन लक मिटाय दियो।
वोना उनको वरता आपरो लगत गुस्सा अखीन हिजड़नो भड़कायो,
अखीन उनला संकट मा डाकयो,
अखीन दुख देवनवालो दूत को दल ला धाड़यो।
वोना आपरो गुस्सा को मारग खोलयो,
अखीन उनको पिरान ला मरनो लक बचायो,
पर उनला माहामारी लक मार ड़ाकयो।
वोना मिसर को सबरी पहेलोठा ला मारयो ,
जोन हाम को डेरा गिनमा मरद गिनो पहेलो फर होतीन।
पर आपरो परजा को लोखहीन ला मेन्ढा-सेरी को जसो ले गयो ,
अखीन जंगल मा उनको अगुवाई जनावर को करप जसी करयो।
तबा वय उनको चलान लक बेखटका चले अखीन उनला काही भेव नही भयो।
पर उनको बयरी सागर मा डूब गयीन।
अखीन वोना उनला आपरो पवीतर देस को सीव तकन ,
योच पहाड़ी देस मा पहुँचायो, जोन वोना आपरो उज्जो हात लक भेट कियो होतो।
वोना उनको मोहरा लक दूसरो राज-राज ला पराय दियो ,
अखीन उनको जमीन ला दोरी लक नाप के बाट दियो,
अखीन इसराइल को गोत गीनला उनको डेरा मा बसायो।
तो भी उन ना परमपरधान परमेस्वर को परिक्सा अखीन येना लक बलवा कियो।
अखीन वोको नियम चितावनो ला नही मनयो,
अखीन मुरक के आपरो पुरखा गिनको जसो दगाबाजी कियो।
उन ना निकम्बो धनुस को जसो धोका दियो वारो होतिन।
काहेका उन ना वरता जघा बनायके वोला रिस दिलायो,
अखीन खुदी हुई मूरती लक वोमा लक जरन उपजायो।
परमेस्वर आयके गुस्सो लक भर गयो,
अना वोना इसरायल ला बिलकुल तज दियो।
उन ना सीलो को रव्हन को जाघा,
मतलब वोय तम्बू ला जो वोना मानूस गिन को बीच ऊभो कियो होतो, तियाग दियो,
अखीन अपरी सामरथ ला बँधुवाई मा जान दियो,
अखीन अपरी सोभा ला आपरो दुस्मन गिनको बस मा कर दियो।
वोना अपरी परजा को लोखहुन ला तलवार लक मरवा दियो,
अखीन अपरो निज भाग को बिरोध मा गुस्सा लक भर गयो।
उनको जुवान स्तो लक भसम भयो।
अखीन उनको जुवान टूरी कुवारी च रह गयीन।
उनको याजक तलवार लक मारो गयो,
अखीन उनकी बेवा रोवनो नही पाईन।
तबा पिरभू मानलेव जपलक चौंक उठयो3
अखीन-अखीन असो बीर को जसो उठयो, जोन अंगूर को रस पीवके ललकारतो होय।
वोना आपरो बयरी गिनला मारके मघा हटाय दियो।
अखीन उनको सदा की नामधराई करायो।
मंग वोना यूसूफ को तम्बू ला तज दियो,
अखीन एपरेम को गोत ला नही निवाड़यो
पर यहूदा च को गोत ला,
अखीन अपरो चहेतो सिय्योन परबत ला निवड़ लियो।
वोना आपरो पवीतर जघा ला लगत उच्चो बना दियो।
अखीन धरती को जसो पक्को बनायो, जोनको पाया वोना सदा को लाय डाकयो से।
मंग वोना आपरो दास दाऊद ला निवाड़ के आपरो जनावर को करप मा कोठा मा लक ले लियो।
उ वोला बच्चा वारी मेन्ढा गिनको मघा-मघा हिन्डनो लक लेयके आयो।
का उ वोकी परजा याकूब की मन्जे वोको नीजी हिस्सा इसराइल ला चराय।
तबा वोना खरो मन लक उनला चरायो,
अखीन अपरो हात को कुसलता लक उनको अगुवाई करयो।
Source notes (3)
- Footnote मी आपरो टोन्ड नीतिवचन कव्हन को लाय उघाडू, यहाँन नीतिवचन को अरथ से उपमा देयके या बरोबरी करके कव्हनो।
- Footnote जब उ उनला घात करन लगतो, जब वोना गुस्सा होयके मरही , सरप गीन अखीन बयरीगीन को लक उनको नास कियो।
- Footnote तबा प्रभु मानो जप लक चवक के जगयो, असो लगासेत का मानलो परमेस्वर जपमा से या घटनागीन को लाय अन्जान से। उ अचानक च भड़क गयो कि वोको परजा को सतरूगिन लक बदला ले।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.