भजनसंहिता 79

देस को सुटकारो को लयी पिराथना

आसाप को भजन

1ओ परमेस्वर, दुसरो राज गिन तोरो हिस्सा मा घुस आयो;

उनना तोरो पवीतर मन्दिर ला अपवीतर करयो।

अना येरूसलेम ला खन्डर बना दियो सेत।

2उनना तोरो सेवक गिन को लास गिनला

बादर को पक्सी को जेवन बना दियो सेत,

अना तोरो भक्तगिन को माँस धरती को

जंगली - जनावर ला खिलाय दियो सेत।

3उनना वोको खून येरूसलेम को चारीकन

पानी को जसो बोहायो सेत,

अना उनला माती देन वालो कोनी च

नाहाती।

4सेजारीगिन को बीच आमरी नाव

धरायी भयो से;

चारीकन का रव्हन वाला आमी पर हँसासेत,

अना मजाक बनावा सेत।

5ओ यहोवा, कबा तकन? काहे तू हरामेसा

को लाय गुस्सा हुयो रव्हे?

तोरो मा स्तो को जसी जरन कबा तकन

भड़कयो रव्हे?

6जोन राज को लोख तोला नही जानसे,

अना जोन राज्यगिन का लोग तोरो लक

पिराथना नही करत,

उन मा आपरी सबच जलजलाहट भड़काय!

7काहेका उनना याकूब ला गिटक लियो ,

अना वोको रव्हन को जघा ला बिरान कर दियो।

8आमरो अधरम को लाय आमरो हमारी

पुरखागिन का हेत नोको कर;

तोरी दया आमरो पर गदने होय, काहेका

आमी बेझा बुरी दसा मा पड़या सेत

9ओ आमरो मुक्तिदाता परमेस्वर, आपरो

नाव को महीमा को जसो आमरी मदद कर;

अना आपरो नाव को जसो आमला

सुड़ायके आमरो पाप ला छिमा कर देय।

10दुसरो देसगिन काहे कव्हन पाहे का

उनको परमेस्वर किता रह्यो?

तोरो दासगिन को खून को बदला दुसरो राज

पर आमारो डोंरा को सामुर लियो जाहे।

11बन्दीगिन को कुन्हावनो तोरो कान तकन पहुँचे;

मरन वालो ला आपरो सक्तिसाली हात लक बचाय लेय।

12ओ पिरभू, आमरो सेजारीगिन ना तोरी बुरायी कियो सेत,

वोको सात गुना बदला उनला देय!

13तबा जो आमी तोरी पिरजा अना तोरी हेड़ की सदा की मेंढी आजन,

तोरो धन्यवाद हमेसा को लाय करत रव्हबोन;

अना पीढ़ी लक पीढ़ी तकन तोरो गुनानुवाद करत रव्हबोन।