भजनसंहिता 80

राज को मंगलक स्थापना को लाय पिराथना

गाना को हुकुम परधान बजानवालो को लाय सोसन्नीमेदूत राग मा आसाप को भजन।

1ओ इसरायल का चरवाहगिन,

तू जोन यूसूफ को अगुवायी मेढ़ागिन हेड़ को जसो करा से, कान लगाय!

यहोवा जो करूब गिनमा बिराजमान से, आपरो तेज चोवाय!

2एपरेम, बिन्यामीन, अना मनस्से को मोहरा,

आपरो बिरता दिसाय के, आमरो उध्दार करन को लाय आव!

3ओ परमेस्वर, आमला जसो को तसो कर दे;

अना आपरो टोन्ड को उजाड़ो चमकाय, तबा आमरो उध्दार होय जाहे!

4ओ सेनाहीन को यहोवा,तू कबा तकन

आपरी परजा को लोखहुन की पिरथना पर गुस्सा रव्हे,1

5तूना आँसू गिनला उनको जेवन बनाय दियो से,

अना मडका भर-भरके उनला आँसू पिबावासे।

6तू आमला आमारो सेजारीगिन ला च झगड़नो को कारन बनावसे;

अना आमरो दुस्मन मनमानी मजाक उड़ाव सेत।

7ओ सेनाहीन को यहोवा, आमला जसो को तसो कर देव;

अना आपरो टोन्ड को परकास आमी पर चमकाये,

तबा आमरो सूटकारा होय जाहे।

8तू मिसर लक एक अंगूर को बेला आनयो,

अना दूसरो रास्ट गिनला हेड़के वोला लगाय दियो।

9तूना वोको लाय जाघा ला तैयार करयो से;

अना वोना जड़ पकड़यो अखिन फैलके देस ला भर डाक्यो।

10वोकी सावली पहाड़गिन मा फैयल गयीन,

अना वोकी डगाल गिन मोठो भगवान को देवदार गिनको जसो भयी,

11वोकी डगाल समूदर तकन बढ़ गयी,

अखिन वोका डीरा नदी तकन फयैल गयी।

12मंग तूना वोको रुधांन ला काहे पाड़ दियो,

का सबा रास्ता चलन वालो वोको फर गिन ला तोड़ सेत?

13बन डुक्कर वोला नास करत डाल सेत,

अखिन बर्रा मा लक सबा जंगली जनावर उनला चरासेत।

14ओ सेनाहीन को यहोवा परमेस्वर, मंग हमरो कना लवट!

सरग ला धियान देयके चोव, अखिन यो अंगूर को बेला को सूधी लेय,

15यो पौधा तूना आपरो उज्जो हात लक लगायो,

अना जो बेला को हिस्सा तूना आपरो लाय मजबूत कियो से।

16ऊ स्तो मा जर गयी, ऊ काप डाकयो गयो,

तोरो गुस्सा लक तोरा दुस्मन नास भयी जाय।

17तोरो ऊज्जो हात ला साजरो लक

राख्यो हुयो वोना मानूस पर तोरो हात राख्यो रव्हे,

ऊ मानूस मा, जोन ला तूना आपरो

लाय मजबूत करयो से।

18तबा आमी लोग तोरो लक नहि मुरकबोन;

तू आमला जिलाय, अखिन आमी तोरो नाव लियो कर सकेत।

19ओ सेनाहीन को यहोवा परमेस्वर, आमला जसो को तसो कर देय!

अखिन आपरो टोन्ड को परकास आमी पर चमकाय, तबा आमी बचायो जाहे!