भजनसंहिता 81

एक तिहार को लय एक गीत

मुखिया बजानवालो को लाय गित्तीथ राग मा आसाप को भजन।

1परमेस्वर जोन आमरो ताकत से, वोको गाना खुसी लक गावो;

याकूब को परमेस्वर को जय जयकार करो!

2गाना गावो, डपली अना मीठ्ठो बजनवालो बीना अना सांरगी ला लेय आवो।

3नवतो चंदा को दिवस,

अना पूनवा ला आमरो बली तिहार को दिवस नरसिंगा फूँको।

4काहेका यो इसरायल को लाय बिधि,

अखिन याकूब को परमेस्वर को ठयरायो हुयो नेम से।

5इनला वोना युसूफ मा गवाही को रीत मा वोना बेरा चलायो,

जबा ऊ मिसर देस को बिरूध चलयो।

वहाँन मीना एक अनजानी गोस्टी आयको,

6“मीना वोको कांधा मा लक बोझा ला उतार दियो;

उनको छिटवा ढोनो मोरो हात लक सूट गयो।”

7तूना संकट मा पकड़के पुकारयो, तबा मीना तोला सूड़ायो;

बादर गरजनो को लुकयो हुयो जाघा मा लक मीना तोरी आयको,

अना मरीबा नामको झरनो को जवर1 तोरो परीक्सा की।

8ओ मोरी परजा को लोखहुन ,आयको , मी तोला चिताय देवासूँ!

ओ इसरायल भला होय का तू मोरी आयक!

9तोरो बीचमा कोनी बेगरो देव नोको रव्हे,

अखिन तू न कोनी परायो भगवान गिनला

नमस्कार नोको करजोस!

10मी तोरो परमेस्वर यहोवा आऊँ,

जोन तोला मिसर देस लक हेड़के लायो से।

तू आपरो टोन्ड ला पसार, मी वोला भर देहुँ,2

11“मंग मोरी परजा को लोकहुन ना मोरी नहि आयकी;

इसरायल ना मोरी गोस्टि नहि मानी।

12एकोलाय मीना वोला वोको मन को हट मा सोड़ दियो,

का वोय आपरी च जुगती गिनको अनुसार चलेत।

13अदि मोरी परजा को लोखहुन मोरी आयके,

अदि इसरायल मोरो रास्ता मा चलेत,

14तबा मी फटाकनारी वोको दुस्मन ला दड़प देहू,

अना आपरो हात उनको दुस्मन गिनको बिरूध चलाहूँ।

15यहोवा को दुस्मन वोको सामुर डर मा नमस्कार करेत!

उनला हमेसा को लाय सजा दियो जाहे।

16मी उनला साजरो लक साजरो गहूँ खवाहूँ,

अखिन मी चट्टान को मीठ्ठो लक उनला सन्तुस्ट करहूँ।”