भजनसंहिता 77

संकट को बेरा मा सान्ती

पिरधान बजावन वारो को लय ;यदूतून को राग मा आसाप को भजन

1मी परमेस्वर को दोहायी चिल्लाय-चिल्लाय के देहू,

मी परमेस्वर को दुहायी देहू, अना वोय मोरो कन कान लगाहे।

2संकट को दिवस मी पिरभू को तलास मा लगयो रह्यो;

राती मा मोरा हात फैयलो रह्यो, अना ढिल्लो नही भयो,

मोरो मा आराम च नही आयो।1

3मी परमेस्वर ला हेत करके रोवासूँ ;

मी चिन्ता करत-करत बेहोस होय चली सेऊँ।

4तू मोला झपकी लगन नही देव;

मी असो घबराय हुयो सेऊँ का मोरो टोन्ड लक बक नही फूटा सेत।

5मीना जूनो जमाना को दिवस ला,

अना जुग-जुग को साल गिन ला सोची सेऊँ।

6मी रात को बेरा आपरो गाना ला हेत करा सेऊ,

अना मन मा धियान कर सेऊ,

अना मन मा भलो साजरो लक बिचार सेऊ,

7“काहे पिरभू हरामेसा को लाय मोला सोड़ देहें,

अना तबा कभ्भु किरपा नही करहे ?

8काहे वोकी करूना हमेसा को लाय जावत रही?

काहे वोको बचन पीढ़ी-पीढ़ी को लाय बिफल भयी गयो?

9काहे परमेस्वर किरपा करनो भूल गयो?

काहे वोना गुस्सा करके आपरी सबा माया ला रोक राख्यो से?”

10मीना कह्यो, “यो तो मोरो दुख आय, का परम परधान को डाक्यो हात बदल गयो से।”

11मी यहोवा को मोठो कारज गिन को चरचा करहूँ;

सच्चो मा मी तोरो पिराचिन काल वालो चमतकार को कारज गिनला हेत करहूँ।

12मी तोरो सबा कारजगिन मा धियान करहूँ,

अना तोरो मोठो कारज ला बिचारहूँ।

13ओ परमेस्वर तोरी मारग पवीतर से।

कवन सो देवता परमेस्वर को बराबर मोठो से?

14चमतकार को काज करन वालो परमेस्वर तू च आस,

तूना राज-राज का लोगहुन पर

आपरी सक्ती पिरकट करयो से।

15तूना आपरो ताकत लक आपरी पिरजा,

याकूब अना यूसूफ को बंस ला सुड़ा लियो से।

16ओ परमेस्वर पानी ना तोला चोयो,2

पानी तोला चोय कर डर गयो,

गहेरो पानी भी कांप उठयो।

17बादर लक मोठी बारिस भयी,

बादर लक सबद भयो

तबा तोरो तीर इता-उता चलीन।

18बवंडर मा तोरो गरजन को सबद आयक पड़यो से,

जगत बिजली लक उजाड़ भयी,

धरती कांप अना हिल गयी।

19तोरो रास्ता संमूदर मा से,

अना तोरो रास्ता गहेरो पानी मा लक हुयो,

अना तोरो पाय को निसान पता नही चलासेत।

20तूना मोसे अना हारून को जसो,

आपरी पिरजा को अगुवायी मेंढागिन करप जसो कियो से।