भजनसंहिता 92

परसनसा को गीत

भजन बिसराम को दिवस को लायी गाना

1यहोवा को धन्यवाद करनो भलो से,

ओ परम परधान , तोरी नाव को भजन गावनो,

2सक्कारी बेरा ला तोरी करूना,

अखिन हरेक राती तोरी वाचा सच्चाई को परचार करनो,

3दाहा तार वारो बाजागिन अखिन सांरगी पर ,

अखिन वीना पर गंभीर अवाज लक गावनो भलो से

4काहेकि , ओ यहोवा , तू ना मोला

आपरो काम लक खुस करयो सेस ;

अखिन मी तोरो हात गिनको काम

को कारन जय जयकार करू

5ओ यहोवा , तोरो काम का च मोठो सेत!

तोरी कलपनागिन लगत गंभीर सेत!

6मूरख मानूस एला नही समजासेत

अखिन मूरख लोख एको बिचार नही करा सेस,

7का दुस्ट जोन गवत को जसो फूलासेत - फरासेत ,

अखिन सबरी अनरथ करनवारो जोन खुसी होवासेत ,

यो एकोलायी होवासे का वोय हमेसा को लायी नस्ट हो जाय!

8पर ओ यहोवा , तू हमेसा विराजमान रव्हजोस

9काहेकि ओ यहोवा , तोरो दुस्मन , हव तोरो दुस्मन नस्ट होहेत,

सबरी अनरथ करनवारो तितर बितर होहेत।

10पर मोरो सींग तू जगंली साँड़हीन को जसो

उच्चो करयो सेस ;

मी सजरो तेल लक चुपड़ो गयो सेऊ।

11मी आपरो दुस्मनगिन पर निघा करके,

, अखिन उन कुकरमीगिन की हाल

जोन मोरो खिलाप उभो होतो ,

आयक सन्तोस भयो सेऊ।

12न्यायी लोख खजूर को जसो फूलेत-फरेत,

अखिन लबानोन को देवदार को जसो बढ़तो रव्हेत।

13वोय यहोवा को भुवन मा लगायो जायके,

आमरो परमेस्वर को आँगन मा फूलेत-फरेत।

14वोय जूनो होवनो मा भी फरतो रव्हेत।

अखिन रस भरयो अखिन लहलहातो रव्हिन,

15जोन लक यो पिरगट होय कि यहोवा सच्चो से।

उ मोरो चट्टान से, अखिन वोमा कपटी काही नहात।