भजनसंहिता 25

रास्ता चोवावन, अखिन रक्सा को लाय पिराथना

(दाऊद को भजन)

1ओ यहोवा, मी आपरो मन ला तोरो कन उठावासू।

2ओ मोरो परमेस्वर, मी ना तोरो च पर भरोसा ठेवासू,

मोला नोको लजान देव;

मोरो सतरू मोरो पर जय जयकार नोको करन पाहे

3अना जेतरो तोरी बाट चोवासे,

उन मा लक कोनी को बेइज्जत नोको होय;

अना जोन बिना कारन दगाबाजी करासेत वोको च बेइज्जति होहेत।

4ओ यहोवा, आपरो रास्ता मोला चोवाय।

अपरो रास्ता मोला सांग देय।

5मोला आपरो सत पर चला अखिन सिक्सा देय,

काहेकि तू मोरो सूटकारा देवन वालो परमेस्वर आस,

मी दिवस भर तोरी बाट चोवतो रव्हासू।

6ओ यहोवा, आपरी दया अखिन करूना को

काम ला हेत कर;

काहेकि यव तो जुग-जुग तकन होतो आयो सेत।

7ओ यहोवा, आपरी भलाई को कारन

मोरो जवानी को पाप गिनला अखिन

मोरो अपराध गिनला नोको हेत कर।

आपरी करूना च को अनुसार तू मोला हेत कर।

8यहोवा भलो अखिन सच्चो से;

येकोलक उ पापी गिनला आपरो रास्ता चोवाहे।

9उ नरम लोखहुन ला नियाव की सिक्सा देहे,

हव, उ दीन लोख हुनला आपरो रास्ता चोवाहे।

10जोन पिरभू को विधान अखीन कानून ला मानासे,

उनको लाय वोको सबरी रास्ता करूना अना सच्चाई सेत।

11ओ पिरभू, आपरो नाव को कारन,

मोरो अधरम जोन लगत सेत छिमा कर।

12उ कोनतो मानूस आय,जोन यहोवा को भेव माना सेत?

यहोवा वोला वोको वोच रास्ता मा जोनलक उ खुस होवासे चलाहेत।

13उ साजरो लक बनो रव्हेत, अना वोको खानदान ऊ देस को अधिकारी होहेत।

14यहोवा उन लोक को संगी सेत जोन वोको भेव अना हुकुम माना से अना वो उनको संग मा आपरो वादा ला पिक्को करासेत। ,

15मोरो डोरा हरामेसा यहोवा पर टकटकी लगायो रव्हासे,

काहेकि वोच मोरो पाय गिनला जाल लक सोडाहेत।

16ओ यहोवा, मोरी कन मुरक के मोरो पर किरपा कर

काहेकि मी एखलो अखिन दुखी सेव।

17मोरो हिरदा को दुख लगत बढ़ गयो सेत,

तू मोला मोरो दुख लक छुड़ाय ले!

18तू मोरो दुख अखिन कसट कन निघा कर,

अखिन मोरो सब पाप हुन ला छिमा कर।

19चोव, मोरो बयरी कसो बढ गयो सेत,

अखिन मोरो लक मोठो बयीर करा सेत,

20मोरो पिरान की रक्सा कर

अखिन मोला सोड़ाय ; मोला नोको लजान दे,

काहेकि मी तोरो सरनागत सेऊ।

21खराई अखिन ईमानदारी लक मोला सुरक्सित राखेत,

काहेकि मोला तोरो च आस से।

22ओ परमेस्वर इसरायल ला

वोको सबरी संकट लक सोडाय ले!