भजनसंहिता 26

एक खरो मानूस को पिराथना

(दाऊद को भजन )

1ओ यहोवा, मोरो नियाव कर,

काहेकि मी खराई लक चलतो रव्हो सेऊ,

अखिन मोरो भरोसा यहोवा पर अटल बनयो से।

2ओ यहोवा, मोला जाच-परख!

मोरो हिरदा अखिन मन ला सुध्द कर!

3काहेका तोरी करूना मोरो डोरा को मोहरा से

मी तोरी सच्चाई को रास्ता मा चलासू।

4मी निकम्मो अना खोटो चाल- चलन वारो को संग नहीं बस्यो,

अखिन मी कपटी हीन को संग किता च नही जाहू;

5मी गलत काम करन वारो की संगति लक घिरना करासू,

अखिन दुस्ट को संग नही बसु।

6मी आपरो हात ला निरदोस होनको पानी लक धोहु,

तब ओ यहोवा मी तोरी वेदी को आखा- पाखा चक्कर लगाहुँ।

7मी उच्चो अवाज लक धन्यवाद करहू

अखीन तोरो सबरी अद्भुत काम गिन को बखान करहू।

8ओ यहोवा, मी उ घर लक पिरेम, करासू,जिता तुम्हि रव्ह सेव, उ जघा जहान तोरो महीमा रव्हासेत।

9मोरो पिरान ला पापी हुन को संग अखिन

मोरो जिन्दगी ला खूनी गिनको संग नोको मिलाय।

10वो तो दुस्टपन करनो मा लगयो रव्हासेत, उनको

उज्जो हात घूस लक भरयो रव्हासे।

11मंग मी ईमानदारी लक चलतो रव्हुन। मोला सोडाय अना मोरो पर किरपा कर!

12मोरो पाय चवरस जघा मा जमयो से

सभा गिन मा मी यहोवा ला धन्य कव्हू।