Powari Standard Project
भजनसंहिता 10
नियाव को लाय पिराथना
ओ परमेस्वर तू एतरो दुहुर काहे उभो रव्हासे?
का संकट मा पड़यो लोखहुन तोला नही चोवासे।
घमंडी दुस्ट मानूस कमजोर मानूस गिनला दुख देवासेत।
वय आपरो रचयो योजना मा फस जासेत।
काहेका दुस्ट मानूस उन चीज हुन पर घमंड करासे।
अना लोभी मानूस धन्य परमेस्वर ला तियाग देवासेत।
अना वोको घिरना करासेत।
दुस्ट मानूस इतरो घमन्डी होवासेत
का वय परमेस्वर को मघा नही चलासेत।
वय बूरो-बूरो योजना बनावासेत।
वय असो काम करासेत जसो कोनी परमेस्वर च नहात।
उ आपरो रास्ता मा पक्कोपन लक बनयो रव्हासेत,
तोरो नियाव को बिचार असो वरता पर होवासेत,
का वोको निघा उता तकन नही पोहचासेत।
जितरो वोको बयरी सेत उन पर वा फुसकाडा सेत।
उ आपरो मन मा कव्हासेत, “मी कभ्भू नही टलहू
मी पीढी-पीढी तकन दुख लक बचयो रव्हु।”
वोको टोन्ड सिराप, छल अन्धेर लक भरयो से,
वोको जुबान मा उपदरा अखीन अनरथ को गोस्टि सेत। 1
उ गाँव गिनमा घात लगाय के लुको रव्हासेत।
वय निरदोस लोख गिनला फसान को मौका मा रव्ह सेत।
वय हान पोहचान को लाय लुको रव्हासेत
अना बेगुनाह लोक गिनला जानलक मार डाकासेत।
जसो सेर आपरो रूझकुड मा वसोच उ भी लुक के घात मा बसो रव्हासेत।
उ गरीब ला धरन को जुगाड़ मा रव्हासेत।
उ गरीब ला आपरो जाल मा फसाय के घसीटा सेत,
अना वोला धर लेवासेत।
उ वयनो भयी जासे, अना दुबक के बसासेत,
अना लचार लोख वोको ताकत वर हात लक पटकनी खावासेत।
एको लाय गरीब मानूस सोचन लगासेत का
परमेस्वर ना अमीला बिसार दियो सेत।
हमरो लक ता परमेस्वर हरामेसा
को लाय दूहूर भयि गयो से।
जोन काही भी घटयो होतो, वोको लक
परमेस्वर ना नजर फेर लियो से।
हे यहोवा, चेत अखिन काही तो कर,
हे परमेस्वर, ऐसो दुस्ट जन गिनला दंड देव
अखिन इन दीन दुखि गिनला नोको भुलस।
दुस्ट जन काय परमेस्वर को बिरुद होसेत ?
कायको लाय वय सोचत सेत कि
परमेस्वर उनला कभ्भु नहीं दन्ड देहे।
तूना चोव लियो से, काहेका तू उपदरा अना
तंगायो जावनो मा नीघा राखासेत,
जोनलक वोको बदला आपरो हात मा राखेत,
लचार आपरो आपला तोरो हातमा सोपासेत,
अनाथ गिनको तू च आसरा आस।
ओ यहोवा, दुस्ट जन को ताकत ला तू तोड डाक,
अना उनको बूरो काम गिनला दूहूर कर देय।
यहोवा अमर बेरा को लाय माहाराजा आय,
वोको देस मा लक राज-राज को लोख नास भयी गयो सेत।
हे यहोवा, तू दीन लोख को इक्सा आयको से।
तू उनकी मनला तय्यार करजोस,
तू कान लगायके आयकजोस।
का अनाथगिन अना पिसो हुयो को नियाव करजोस,
जोन लक मानूस जोन माती लक बनयो से,
मंग भेव नोको दिसावनो पाय।
Source notes (1)
- Cross-reference रोमियो 3:14
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.