भजनसंहिता 68

इसराएल की जीत गान

मुखिया बजानवालागिन को लायी दाऊद को भजन

1परमेस्वर उभो होय, वोको दुस्मन तितर- बितर होय,

अखिन ओका बैरी ओको मोहरा लक पराय जाय!

2जसो धूंगा उड़ जाव से, वसो च तू उनला

उडा दे,

जसो मोम इस्तो की आँच लक पिघल जावासे,

वसो च दुस्ट लोख परमेस्वर की हाजरी लक नस्ट होय।

3पर न्यायी खुस होवे, वोय परमेस्वर को समोर

खुसी होवे, वय मजा मा मगन होवे!

4परमेस्वर को गाना गाओ, वोको नाव को भजन गाओ,

जोन बिन पानी को देसगिन मा सवार हो चलासे।

ओको लाय रास्ता बनाओ, वोको नाव यहोवा आय,

एकोलायी तुम्हि ओको मोहरा खुसी होय!

5परमेस्वर आपरो पवीतर जघा मा

अनाथगिन की अजी अखिन बेवागिन को नियायी से।

6परमेस्वर अनाथगिन को मकान ला बसावासेत,

अखिन बन्दी गिनला सुड़ा के धनी बनावासे,

पर हठीलो गिनला सुक्को धरती मा रव्हनो पड़ा से।

7ओ परमेस्वर, जबा तू आपरो परजा को पुढो- पुढ़ो चलत होतो,

जबा तू बिन पानीको धरती मा सेना समेत चलयो, ( सेला ) 81

तबा धरती कपन लगयो,

अखिन बादर भी परमेस्वर को समोर पिघलनो लगयो ,

उता सिनाई पहाड़ी परमेस्वर ,

हव इसरायल को परमेस्वर को समोर कपन लगयो।

9ओ परमेस्वर, तू लगत सो बरसात करयो,

तोरो निज हिस्सा लगत सुक्को होतो,

पर तू ओला हरो-भरो कर दियो सेत,

10तोरो लोग वोमा बसन लगयो, ओ परमेस्वर,

तू आपरो भलाई लक गरीब जन

को लायी तैय्यारी करयो से।

11पिरभू हुकूम देवासे,

तबा साजरा बारता आयकवान वालि बायको गिन

की मोठि गिनती भयी जासे।

12आपरो-आपरो सेना समेत राजा परायो जाव सेत,

अखिन घरवाली बायको गिन लूटयो ला बाट ले सेत।

13काजक तुम मेढा को कोठा को बीच लेट जाओ,

अखिन एसो परेवा को जसो होजोस

जोन को पंखा खूरो लक अखिन

जोनको पंखा पीवरो सोन्नो लक मढ़ायो हुया सेत?

14जबा सब ले सर्वसक्तीमान न वोमा राजा गिनला

तितर बितर करयो,

तबा मानो सल्मोन पहाड़ी पर बरप पड़यो।

15बासान को पहाड़ी परमेस्वर को पहाड़ी से;

बासान को पहाड़ी लगत छेन्डीवारो पहाड़ी से।

16पर ओ छेन्डीवारो पहाड़गिन,

तुम काहे वोना पहाड़ी ला घूरासेव,

जोनला परमेस्वर न आपरो

रव्हन को लायी चहायो सेस,

अखिन जिता यहोवा हरामेसा वास करहेत?

17परमेस्वर को रथ बीस हजार,

बलकि हजार-हजार सेत,

पिरभू उनको बीच मा से,

जसो सिनाई पवीतर जघा मा से।

18तू ऊच्चो मा चघयो,

तू लोख गिनला गुलामी मा ले गयो,

तू मानूस गिन लक, वरन हठीलो मानूसगिन

लक भी चघावा लियो,

जोन लक यहोवा परमेस्वर वोमा रव्हेत।

19धन्य से पिरभू , जोन हररोज हमारो बोझा उचलासे,

उ आमरो च उध्दार करनवारो परमेस्वर आय।

20वो च मोरो लायी बचावनवारो परमेस्वर ठयरो,

यहोवा पिरभू मौऊत लक भी बचावा से

21पक्को परमेस्वर आपरो दुस्मनगिन को डोसका पर ,

अखिन जोन अधरम को रास्ता पर चला सेस ,

वोको केस भरयो खोपड़ी मा मार-मार के

ओला चकनाचूर करहे।

22पिरभू न कह्यो , मी वोला बासान लक हेडू,

मी उनला गहेरो सागर को खाल्या लक

लवटा लाहून, का

23तू आपरो पाय ला खूनमा बुडायो,

अना तोरो दुस्मन तोरो कुतरा गिनको हिस्सा ठयरेत।

24ओ परमेस्वर, तोरी जीत को बरात चोयो गयी,

मोरो पिरभू, मोरो राजा की चाल

पवीतर जघा मा चोयो से।

25गानवालो पुढ़ो- पुढ़ो अखिन तारवारो बाजा को

बजानवालागिन को मंघा-मंघा गइन,

चारीकन कुवाँरी बाया डफ बजावत होतिन।

26सभागिन मा परमेस्वर,

को, ओ इसरायल को खानदान लक हिटयो लोखहुन,

पिरभू को धन्यवाद करने।

27वहाँ वोय अधिकारी नाहनो बिन्यामीन से,

वहाँ यहूदा को हाकिम

आपरो हाली-मोहाली समेत से,

उता जबूलून अखिन नप्ताली भी को हाकिम सेत।

28तोरो परमेस्वर न हुकूम दियो

को तोला सामरथ मिल्हे

ओ परमेस्वर,

जोन कछु तू हमरो लायी करयो सेस,

वोला पक्को कर।

29तोरो मंदिर को कारन जोन येरूसलेम मा से,

राजा तोरो लायी चघावा ले आहेत।

30घाघरा काडी को रुझकाडी गिनमा रव्हनवारो जंगली जनावर ला

सान्डियाहुन को हेड़ ला अखीन देस-देस को

नाटा गिनला डटकार देय। वोय खूरो को

तुकड़ागिन लायो हुया परनाम करहेत,

जोन लोख को दल लड़ाई लक खूस रव्हासेत,

उनला वोना तितर बितर करयो से।

31मिसर लक अधिकारी आहेत,

कूसी आपरो हातागिन ला परमेस्वर को

कन लवकर लक फयलाहेत।

32ओ धरती मा को राज्य-राज्य को लोखहीन,

परमेस्वर को गाना गाओ;

पिरभू को भजन गाओ,

33जोन सबसा उच्चो सनातन सरग मा

सवार होयके चलासे ;

चोवो उ आपरो बानी आयकायो से ,

वोको गंभीर बानी ताकतवर से।

34परमेस्वर को ताकत की स्तुति करो,

वोको परताप इसरायल पर छायो हुयो से,

अखिन वोय ताकत बादल को वरता मा से।

35ओ परमेस्वर, तू आपरो पवीतर जघा मा

भेव को काबिल सेत,

इसरायल को परमेस्वर च आपरो परजा ला

सामरथ अखिन ताकत को देवनवालो से।

परमेस्वर धन्य से।