भजनसंहिता 69

संकट को बेरा मा मदद को लाय हाकलनो

मुखिया बजान वालो को लाय सोसन्नीम राग मा दाऊद को गीत

1ओ परमेस्वर मोला बचाय! मी पानी मा बुडासू।

2मी मोठो दल-दल मा धसो जावासू,

अना मोरो पाय कँहू नही थमा सेत,

मी गहेरो पानी मा आय गयो,

अना धार धरके बुडो जावासू।

3मी हाकलत-हाकलत थक गयो मोरो गरो सूक गयो से

आपरो परमेस्वर को बाट चोवत-चोवत

मोरी डोरा धुंधरी पड़ गयी।

4जोन बिना कारन को मोरो बयरी सेत,

वोय मोरो डोका को चुन्दि लक जादा सेत,

मोरो नास करनवालो जोन बेकार मोरो दुस्मन सेत,

वोय ताकतवर सेत,

एकोलाय जोन मी नही लूटो वा भी मोला देनो पड़यो।

5ओ परमेस्वर ,तू तो मोरी मुरखपन ला जानासेत,

अना मोरो दोस तोरो लक लुको नहात।

6ओ पिरभू, ओ सेनाहीन को यहोवा, जोन तोरी बाट,

चोवासेत, उनको आस मोरो कारन नोको टुटे,

ओ इसरायल को परमेस्वर, जोन तोला तपासा सेत,

उनको तोन्ड कभ्भू मोरो कारन, कारो नोको होय।

7तोरो च कारन मोरी निन्दा भयी,

अना मोरो तोन्ड लाज लक झाको हुयो से।

8मी आपरो भाऊहुन को मोहरा अन्जान भयो,

अना आपरो सग्गो भाऊ हुन को निघा मा,

परदेसी ठयरो सेऊ।

9काहेका मी तोरो भुवन को धून मा

जरतो, जरतो भसम भयी गयो।

अना उन जोन तोरी निन्दा करासेत,

वोच निन्दा मोला सयनो पड़यो सेत।

10जबा मी रोय अखिन उपास करके दुख उठात होतो,

तबा वोय लक भी मोरो नावधराई च होती।

11जबा मी टाट को कपरा घालयो होतो,

तबा लोख मोरो मजाक उड़ावत होतीन।

12बेसकूड़ को जवर बसनवारो मोरो बिसय गोस्टी करासेत,

अखिन दारू पीवनवालो गिन मोरो पर लक गाना बनाय के गावासेत।

13पर ओ यहोवा, मोरो पिराथना त तोरी खुसी की बेरा मा हो;

ओ परमेस्वर, आपरो किरपा को लगतसो,

अखिन मुक्ति को सही वादा को

को अनुसार मोरी आयक ले।

14मोला दलदल को चिखल मा लक उभार

को मी कँहू धस ना जाऊ

मी आपरो बैरीगिन लक,

अखिन गहेरो पानी मा लक बच जाऊ।

15मी पुरा पानी मा नोको बुड जाऊ,

अखिन न मी गहेरो पानी मा बुडू के मरू,

अखिन ना मोला समाधी मा जावनो पड़े।

16ओ यहोवा, मोरो आयक,

काहेकि तोरी करूना चोखो सेस;

आपरो लगत सो दया को अनुसार मोरो पर धियान देव।

17आपरो नवकर लक आपरो टोंड न मोड़;

काहेकि मी संकट मा सेव,

18मोरो कठा आयके मोला बचाय ले,

मोरो बयरीगिन लक मोला सूटकारा दे।

19मोरो नाव धराई अखिन लज्जा अखिन अपमान

ला तू जानासे

मोरो सबरी बयरी तोरो समोर सेत।

20मोरो हिरदा नाव धराई को कारन फट गयो,

अखिन मी लगत उदास सेउ

मी कोनी तरस खावनवारो को आसा त को,

पर कोनीला पा, अखिन सान्ति देवन वालो गिन ला ढूँढ़त,

पर कोनी नही भेटयो

21लोखगिन न मोला खान को लायी जहेर इंदरावन दियो,

अखिन मोरो तहान बुझान को लायी

मोला सिरका जूनो अंगूर को रस पिवायो1।2

22उनको जेवन उनको लायी फन्दा भयी जाय!

अखिन उनको सांती की बेरा जाल बन जाय।

23उनको डोरागिन मा इन्धारो छाय गयो,

जोनलक वोय चोव नही सकेत,

अखिन तू उनको कम्मर ला लगातार कँपातो रव्ह।

24उनको वरता आपरो गुस्सा भड़काय,

अखिन तोरो गुस्सा की आँच उनला लगे।

25उनकी तम्बू उजड़ गयी,

उनकी डेरा गिनमा कोनी नोको रव्हे।3

26काहेकि जोनला तू मारयो, वोय वोको

मंघा पड़ी सेत,

अखिन जोनला तू घायल करयो, वोय वोको

दरद को गोस्टी करासेत।

27उनको अधरम मा अधरम बढ़यो,

अखिन उनला तोरो नेकी नही भेटयो।

28उनको नाव जिन्दगी की किताब मा लक काट दियो जाय,

अखिन न्यायी गिन की संग नोको लिखयो जाय।

29पर मी त दुखी अखिन तंगायो हुयो सेऊ,

एकोलायी ओ परमेस्वर,

तू मोरो उध्दार करके मोला उच्चो जघा मा बसाय।

30मी गाना गायके यहोवा नाव की स्तुति करू,

अखिन धन्यवाद करतो हुयो तोरी बड़ाई करू।

31यो यहोवा ला बईल लक जादा, बलकि सींग

अखिन खूरवालो बइल लक भी जादा भाहेत।

32नरम लोख वोला चोवके खुस होहेत,

ओ परमेस्वर ला तपासन वालो गिन,

तुम्हरो मन हीवरो भयी जाहेत।

33काहेकि यहोवा गरीबगिन को कन कान लगयो,

अखिन आपरो लोखगिन ला

जोन बन्दी सेत उनला बेकार नही जानासेत।

34सरग अखिन धरती वोकी स्तुति करहेत,

अखिन समुंदर आपरो सबरी जीव जन्तुगिन

समेत वोकी स्तुति करे।

35काहेकि परमेस्वर सिय्योन ला बचाहेत,

अखिन यहूदा को नगर गिनला मग लक बसाहेत,

अखिन लोख मग उता बसके अधिकारी

होय जाहेत।

36वोको नवकरगिन को बंस वोला

आपरो हिस्सा मा भेटेत,

अखिन वोको नाव को चहेतो वोमा रव्हेत।