भजनसंहिता 38

रोगी मानूस को पिराथना

(यादगार को लाय दाऊद को भजन )

1पिरभू, गुस्सा मा आयके मोला नोको झिड़क;

आपरो गुस्सा लक मोला सजा नोको देस।

2तोरो तीर लक मोला छेद दियो से;

अना मी तोरो हात खाल्या दड़प दियो से।

3तोरो गुस्सा को कारन मी बेझा दुख मा सेउ।

मोरो पाप गिनको कारन मोरो सप्पा तन रोगी भयी गयो से मोरो मा सांती नहात।

4मीना आपरो बुरो काम अधरम लक डोस्का तक बुड गयो सेव;

उ बोझा को जसो मोरो पर लगत भारी से।

5मोरी मुरखपन को कारन कोड़े लक लगयो घाव बसाव से।

अखिन सड़ गयो सेत।

6मी नव गयो सेव, धूरा मा सन गयो सेऊ।

मी दिवस भर विलाप करत फिरत सेव।

7काहेकि मोरी कम्मर मा जलन से,

अखिन मोरो तन मा साजरोपन नहात।

8मोरो मा काही बल नहाय अखिन लगत च दुख लक भरयो गयो सेऊ;

मी आपरो मन की घबराहट लक कुन्हाव सेउ।

9हे मालीक, मोरो इक्सा तोरो मोहरा से;

मोरो कुन्हानो तोरो लक छिपयो नहि से।

10मोरो हिरदा धड़कासे, मोरी ताकत जाय रही से;

अखिन मोरो डोरा को रोसनी जावत रव्ह्यो।

11मोरो चहेतो संगी अखिन साथी मोरो आफत को बेरा मोरो लक बेगरो भय गइन।

मोरो खानदान वारो भी दुहुर उभो सेत।

12मोरो जियान को खोजी जाल फैलाव से;

मोला हानि पहुचावन वारो लक मोरो बिनास को गोस्टी करासे ;

उ दिवस भर छल-कपट को गोस्टी बिचारासे।

13अना मी बावरो को जसो नही आयकासु,

अखिन मी गूँगो को जसो चुप नही भयी जावासू।

14पर मी एसो मानूस को जसो सेव जोन काहीं नहीं आयके,

अखिन जेको टोन्ड लक विवाद को कोनी गोस्टी नहि हिटत।

15अना ओ यहोवा, मी न तोरो च पर आपरी आस लगाई से ;

हे पिरभू, मोरो परमेस्वर, तू च जवाब देह।

16काहेकि मी ना कह्यो, “एसो न होय कि वय मोरो पर खुसी मनाये,

जब मोरो पाय फिसल जावसे, तब उ मोरो पर आपरी बड़ाई मार से।”

17काहेकि मी ता अबा पड़नो पर सेउ,

काहेका मोरो दरद लगातार मोरो मोहरा से,

18एकोलाय कि मी तो आपरो अधरम ला परगट करुँ,

अखिन आपरो पाप को कारन चिन्ता मा सेऊ।

19पर मोरो दुस्मन लगत फुरतीला अना ताकतवर सेत।

जोन मोरो लक बेकार मा घीरना करासेत वय बयरी लगत सेत।

20जोन भलाई को बदलो मा बुराई करासेत,

वय भी भलाई को मंघा चलन को कारन मोरो बिरोध करासेत।

21ओ यहोवा, मोला छोड़ न देव।

ओ मोरो परमेस्वर, मोरो लक दूहुर नोको होय।

22ओ मोरो उध्दार करन वारो पिरभू,

मोरी मदत कर।