भजनसंहिता 39

पीड़ित मानूस को पसचाताप

(यदूतून परधान बजानवारो को लाय दाऊद को भजन )

1मी न कह्यो , “मी आपरो चाल-चलन की चौकसी करुँ, जेकोलक मी आपरी जिबली को कारन पाप नोको करुँ।

जब लक दुस्ट मोरो मोहरा से, मी आपरो तोन्ड मा लगाम देहुँ।”

2मी मुका अखिन उगोमुगो होतो।

मी भलाई को लाय चुप रह्यो; आन मोरी दुख जादा भय गई।

3मोरो भीतर च भीतर मोरो हिरदा उबल उठयो;

मोरो सोचत-सोचत इस्तो धधकन लगयो, तब मी न बोलन लगयो,

4“हे पिरभू, मोरो अन्त मोला सांग देव।

मोरो जिन्दगी केतरो दिवस को आय?

मोला सांग देव कि मोरो जीवन केतरो छिन को आय।

5तून मोरो जिन्दगी ला बिल्लस भर को बनायो से।

मोरी उमर तोरो मोहरा काही भी नहात।

सचमुच सब मानूस की दसा सांस च आय।

6सचमुच मानूस सावली जसी चलासे,

सच्ची मुच्ची मा बेकार घबराववासे,

ऊ धन ला जमा तो करासे, पर वोला मालूम नहात का कउन वोला लेहेत।1”

7“अब ओ पिरभू, मी कोनतो गोस्टि की रास्ता चोहू?

मोरी आसा तो तोरो कन लगयो से।

8मोला मोरो सबा अपराध गिन लक मोला छुड़ा देव।

मूरख मोरी निन्दा नोको करन पाहे।

9मी मुको बन गयो अखिन तोन्ड नहि उघाड़ो;

काहेकि यव काम तू नाच करयो से।

10तू ना जोन आफद मोरो पर डाकयो से वोको लक मोला दूहूर कर देय, काहेका मी तोरो हात को मार लक भसम भयी गयी सेऊ।

11जब तू न मानूस को अधरम को कारन डाँट-डपट के सिकावासेत, कर

तबा तू ओकी खोबसुरती ला बत्तर को जसो नास कर देवासे;

सचमुच मा सप्पा मानूस बेकार को घंमड करासे।”

12“ओ पिरभू, मोरी पिराथना आयक, मोरी दुहाई पर धियान देव।

मोरो रोवनो आयक के सानत नोको रव्ह।”

काहेकि मी काही बेरा को लाय तोरो संग एक परदेसी यातरी को जसो सेऊ।

मी आपरो आजा-बाबा को जसो दुसरो देस को सेव।

13आह! ऐको लक पुढा कि मी इता लक चलयो जाहुँ अखिन नहि रव्हू,

मोला बचाय ले जेको लेक मोला खुसी को जिन्दगी भेटेत।