Powari Standard Project
भजनसंहिता 40
स्तुति को गाना
परधान बजानवारो को लाय दाऊद का भजन
मी धीरज लक यहोवा की बाट चोवत रव्हासुू।
अखिन ओना मोरी कन नव के मोरी मदद करके दोहाई आयकीस।
ओने मोला सत्यानास को खोदरा लक अखिन दलदल को चिखल लक उभारयो,
अखिन मोला चट्टान पर उभो करके मोरो पाय ला पिक्को करयो से।
पिरभू न मोला एक नवतो गीत सिकायो से; जोन आमरो परमेस्वर को स्तूती को से।
लगत झन येव देख के घबराहेत; अखिन वय पिरभू पर भरोसा करेत।
का च धन्य से ऊ मानूस, जोन पिरभू पर भरोसा ठेवासे,
जोन घंमड़ी हीन अना झूठो भगती करन वालो कन तोन्ड नही फेरासेत।
ओ पिरभू, मोरो परमेस्वर तूना लगत सो काम करयो से!
जोन अचरज को काम अखिन कल्पनागीन तू आमरो लाय करासे।
ऊ लगत सी से;तोरो जसो कोनी नहात।
अना ओकी गिनती नहीं भय सकासे।
तोला होम बली अखिन भेंट को चाहत नहात।
तूना मोरो कान गीनला खोद के उघाडो सेत, का मी तोरी नेम को पालन करुँ;
तोला इस्तोबलि अखिन पापबलि नही पाहीजे।
तब मी न कह्यो, “देख, मी आयो सेव;
काहेका किताब मा मोरो बिसय असो च लिख्यो हुयो से।
ओ मोरो परमेस्वर मी तोरी मनसा ला पूरो करन लक सुखी सेऊ।
तोरो नियम मोरो हिरदय मा बसयो से1।”
मी ना मोठो सभा मा नेकी को साजरा बारता
को बखान करयो सेऊ;
देख, मी न आपरो टोन्ड ला बंद नहीं करयो
ओ यहोवा, तू एला जानसे।
मी न तोरो न्यायी मन मा लुकाय के नही ठेयो,
मी न तोरी सच्चाई अखिन
तोरो करयो गयो उध्दार की गोस्टी करयो सेव,
मी न तोरी करूना अखिन सत्य ला
मोठी सभा लक छुपाय के नहीं राखयो।
हे यहोवा, तू भी आपरी मोठी दया मोरो पर लक नोको हटाव,
तोरी करूना अखिन सत लक लगातार मोरी रक्सा होवतो रव्हे।
सहायता को लाय पिराथना
(भजनसंहिता 70)
काहेका मी बेगिनती बुराइगिन लक घिरयो हुयो सेव ,
मोरो अधरम को काम ना मोला धरलियो
अखिन मी नजर नहीं उठाय सकू
वय गिनती मा मोरो डोस्का को बाल गिन लक भी जादा से
ऐकोलाय मोरो मन टूट गयो।
ओ यहोवा, किरपा करके मोला छुड़ा लेव।
हे यहोवा, मोरी मदद को लाय लहाकी कर।
जोन मोरो पिरान की खोज मा से,वे सब लज्जित होय
अखिन उनको टोन्ड कारो होय
अखिन वो मंघा हटयो अखिन अपमान करयो जाहे
जोन मोरी हानि लक परसन होवासे।
जोन मोरो लक “आहा-आहा,” कव्हासे,
वय आपरी लज्जा को मारे अचरज लक भर जाय।
आन ऊ लोख जोन खोज करा से ,
वोय सबरी तोरो कारन लक हरसीत अना खुसी भयी जाय।
जोन तोरो उध्दार लक पिरेम कर से ,
वय लगातार येव कव्हत रव्हे ,“पिरभू महान से।”
मी तो कमजोर अखिन गरीब सेव,
तबा भी पिरभू मोरी चिन्ता करासे।
तू मोरी मदद करन वालो अखिन छुड़वानवारो से
ओ मोरो परमेस्वर, उसीर नोको कर।
Source notes (1)
- Cross-reference इब्रानियो 10:5-7
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.