भजनसंहिता 135

स्तुति को गाना

1यहोवा को स्तुति करो,

यहोवा का नाव का स्तुति करे,

ओ यहोवा का सेवको तुम स्तुति करो,

तुम जेना यहोवा का भवन मा,

2मजे, आमरो परमेस्वर को भवन को,

आंगनगिनमा उभो रव्हासो!

3यहोवा को स्तुति करो,

काहेका यहोवा भलो से, वोको नाव को भजन गावो,

काहेका वा मनमोहक से।

4यहोवा ना तो याकूब ला आपरो लाय निवाड़ो से,

5मी तो जानासू का आमरो पिरभू यहोवा

सबरी देव गीनलक महान से।

6जोन काही यहोवा ना चाह्यो,

वोला वोना बादल अना धरती अना सागर

अना सबरी गहेरो जघा मा कियो से।

7वा धरती का छोर लक कुहुटा उठासे,

अखिन बरसात को लाय बिजली बनावा से। अना, वारा ला आपरो भन्डार लक हेड़ासेस।

8वोना मिसर मा का मानूस का जनावर,

सबरी पहिलोठा ला मार डाख्यो!

9ओ मिसर, वोना तोरो बीच मा

फिरौन अखिन वोको सबरी सेवकगिन को बीच

निसान अना चमतकार कियो से।

10वोना लगत सो राज गिनला नास कियो

अखिन ताकतवर राजा गिनला मार डाकयो।

11मजे एमोरी गिन का राजा सीहोन, ला

अखिन बासान को राजा ओग, ला

अखिन कनान को सबरी राजागिनला।

12अखिन उनको देसला बाँटके,

आपरो परजा इसरायल को हिस्सा

होवन को लाय दे दियो।

13ओ यहोवा, तोरो नाव लक हरामेसा को लाय पक्को से,

ओ यहोवा, जोन नाव लक तोरो नाव हेत करासेत,

अना पीढ़ी-पीढ़ी लक बनयो रहेत।

14यहोवा ता आपरो परजा को नियाव करहेत,

अखिन अपरो सेवकगिन को दुरदसा चोवके,

तरस खाहेत।

15राज-राज को मूरतगिन सोन्नो- खूरो को च सेत,

जोन मानूस गिनको बनायो हुयो सेत।

16उनको टोंड ता रव्हसे, पर वोय बोल नही सकत,

उनको डोरा ता रव्हासे पर चोव नही सकत,

17उनको कान तो रव्हासेत,

पर आयक नही सकत,

न वोको काही भी सास नही चलासेत।

18जसो वोय से वसोच उनको बनानवालो भी सेत ,

अना उन पर सबरी भरोसा राखन वालो भी वसोच भयी जाहेत!

19ओ इसराइल को घराना,

यहोवा ला धन्य कव्हो,

ओ हारून को घराना, यहोवा ला धन्य कव्ह!

20ओ लेवी को घराना, यहोवा को धन्य कव्ह!

ओ यहोवा को डरानवालो, यहोवा को धन्य कव्ह!

21यहोवा जोन येरूसलेम मा रव्हासेत,

वोला सिय्योन मा धन्य कव्हतो जाव!

याह का स्तुति करो!