भजनसंहिता 53

मानूस को मुरख पन अना दुस्ट पन

(भजनसंहिता 14)

परधान बजान वालो को लाय महलत को राग मा दाऊद को मस्कील

1मूरख न आपरो मन मा कह्यो , “कोनी परमेस्वर च नहात।”

वोय बिगड़ गयीन, उनना बुराई को घिनोनो काम करी सेत,

कोनी साजरो काम करनवालो नहात।

2परमेस्वर न सरग मा लक मानूस गिनको वरता निघा कियो

जोनलक चोये का कोनी अक्कल लक चलनवालो या

परमेस्वर ला पूसनवालो सेत, का नहात।

3वोय सबरी को सबरी च हट गयीन,

सबरीच एक संगा बिगड़ गयीन ;

कोनी साजरो काम करनवालो नहात,एकठन भी नहात।1

4का वोय सबरीच अनरथ करनवालो गिनला काही गियान नहात,

जोन मोरो लोखगिन ला असो खावासेत जसो भाकर

अखिन परमेस्वर की नाव नही लेवासेत?

5उता उनको मा भेव छाय गयी जिता

भेव को कोनी कारन नही होतो।

काहेकि यहोवा न उनको हाड़ गिनला,

जोन तोरो खिलाप तम्बू ड़ाकयो रव्हत होतीन उनला बगरा दियो,

तूना उनला सरमा दियो एकोलायी का

परमेस्वर ना उनला निकम्मा ठयरायो से।

6साजरो होतो, का इसरायल को सप्पा उध्दार सिय्योन लक हिटतो!

जबा परमेस्वर आपरो लोखहुन ला गुलामी लक लवटा ले आनेत।

तबा याकूब मगन अना इसराएल खुस होहेत।