भजनसंहिता 52

परमेस्वर को नियाव अखिन किरपा

मुखिया बजानवालागिन , को लायी मस्कील मा दाऊद को भजन जबा दोएग एदोमी ना साऊल ला सांगयो का दाऊद अबीमेलक को मकान गयो से,

1ओ बीर, तू बूराई करनो मा काहे घमंड़ करासे ?

पिरभू की करूना त अमर से।

2तोरो जिबली सिरप दुस्टता गढ़ासे,

पजायो हुया छूरा गिनको जसो, वा छल को काम करासे।

3तू भलाई लक बढ़के बूराई मा,

अखिन धरम को गोस्टि लक बढ़के झूठ लक माया ठेवासे।1

4ओ छल चहेतो जिबली ,

तू सबरी सत्यानास करनवारी गोस्टि गिन लक खूस रव्हासे।

5पक्को परमेस्वर तोला हरामेसा को लायी नास कर देहेत,

वा तोला धरके तोरो डेरागिन लक हेड़ देहेत,

अखिन जिन्दो लोख गिन को बीच लक तोला उखाड़ डाखेत।

6तबा नेक लोख यो घटना ला चोवके डराय जाहेत,

अखिन असो सांग के वोको मजाक उडाहेत,

7“चोवो, यो वोच मानूस आय जोन परमेस्वर ला आपरो सरन नही मानयो,

पर आपरो लगत सो धन मा भरोसा ठेवत होतो,

अखीन आपरो आप ला दुस्टता मा पिक्को करत रह्यो! ”

8पर मी ता परमेस्वर को भुवन मा जयतून2 को हिवरो झाड को जसो सेऊ।

मीना परमेस्वर की करूना मा हरामेसा-हरामेसा को लायी भरोसा ठेवासू।3

9मी तोरो धन्यवाद हरामेसा करहीन,

काहेका तूच यो काम करयो सेस।

मी तोरोच नाव की रास्ता चोवत रव्हीन,

काहेकी यो तोरो पवीतर बिस्वास जोग सेवक लोक गिन को मोहरा साजरो से।