भजनसंहिता 51

पाप-छिमा को लायी पिराथना

मुखिया बजानवाला गिनको लायी दाऊद को भजन , जबा नतान भविस्यवक्ता वोको जवर एकोलायी आयो का वोय बतसेबा को जवर गयो होतो

1ओ परमेस्वर, आपरो करूना को अनुसार मोरो पर किरपा कर,

आपरो मोठो दया को अनुसार मोरो अपराध गिनला मिटाय दे

2मोला साजरो लक धोय के मोरो अधरम दूहुर कर,

अखिन मोरो पाप सुड़ाके मोला पवीतर कर!

3मी त आपरो अपराध गिनला जानासू,

अखिन मोरो पाप लगातार मोरो निघा मा रव्हासे।

4मी सिरप तोरो च खिलाप पाप करयो,

अखिन जोन तोरो निघा मा बुरो से वोच करयो सेऊ,

जोनलक तू बोलन मा धरमी1

अखिन नियाय करनो मा बेएब ठयरेत।

5चोव, मी अधरम को संग जलम लियो सेऊ,

अखिन पाप को संग आपरो माय को पोट मा पडयो।

6चोव, तू हिरदय की सच्चाई लक खूस होवा सेस,

अखिन मोरी मन मा च अक्कल सिकावजोस।

7जूफा2 लक मोला सूद कर, त मी पवीतर भयी जाहीन, मोला धोय,

अखिन मी बरप लक भी जादा पान्ढरो बन जहीन।

8मोला खुसी अखिन मजा को गोस्टि आयकवा,

जोन लक जोन हाड़गिन ला तूना तोड़ डाकी सेत , वोय मगन भयी जाहेत।

9आपरो चहेरा मोरो पाप गिनको कन लक मुरकाय ले,

अखिन मोरो सारो अधरम को काम गिनला मिटाय दे।

10ओ परमेस्वर, मोरो भितर सूद मन पयदा कर,

अखिन मोरो भीतर पक्को आत्मा नवतो रीत लक पयदा कर।

11मोला आपरो हाजरी लक नोको हेड़,

अखिन आपरो पवीतर आत्मा ला,

मोरो लक बेगरो नोको कर।

12आपरो करयो हुया मोक्स को खुसी मंग मोला दुबारा देय,

अखिन ऊध्धार को आतमा देयके मोला संबाल।

13तबा मी अपराधी गिनला तोरो रास्ता सिकाहीन,

अखीन पापी तोरो कन मुरक जाहेत।

14ओ परमेस्वर,ओ मोरो उध्दार करन वालो परमेस्वर,

मोला खून को अपराध लक सुडाय ले,

तबा मी आपरो टोन्ड लक तोरो नेकी को जय जयकार करबीन।

15ओ पिरभू मोरो टोन्ड ला उघाड दे

तबा मी तोरो गुनगान कर सकहीन।

16काहेकि तू मेल बली लक खुसी नही होवासे,

नही ता मी देय देवतो, होम बली लक भी तू खूस नही होवासेत।

17टुटयो मन परमेस्वर को लाइक बली से,

ओ परमेस्वर, तू टुटयो अखीन पीसो मन ला बेकार नही जानासेत।

18किरपा कर के, सिय्योन को भलो कर,

येरूसलेम नगर को परकोट ला तू बनाय,

19तबा तू धरम को बलीदान मन्जे

पूरो पसु को होम बली लक खुस होहे, तबा नाटा को बलीदान लक तू खूस होवजोस।

तबा लोख

तोरी वेदी मा बईल चघाहीन।