भजनसंहिता 50

सच्चो अराधना

(आसाप को भजन )

1सर्वसक्तिमान परमेस्वर यहोवा ना सांगयो से,

अखीन दिन उगती लक दिन बुडती तकन,

धरती को लोग गिनला हाकली से।

2सिय्योन लक,जोन गजब खोपसूरत से,

परमेस्वर ना आपरो तेज चोवायो से।

3आमरो परमेस्वर आहेत अना उघो मूघो नही रव्हेत,

स्तो वोको पुढा-पूढा भसम करतो जाहेत,

अखीन वोको चारी कन मोठी आन्धड चलहेत।

4उ आपरो परजा को नियाव करन को लाय,

वरता को बादल अना धरती ला भी हाकलेत।

5“मोरो भरोसा लायिक सेवक लोग गिनला मोरो जवर जमा करो,

जोनना बली चघाय के मोरो लक करार कियो से!

6सरग वोको धरमी होवन को परचार करहेत,

काहेका परमेस्वर तो खुदच न्यायी से।” (सेला)

7“ओ मोरो परजा आयक मी कव्हासू,

अखीन ओ इसरायल , मी तोरो बारेमा गवाही देवासू।

परमेस्वर तोरो परमेस्वर मी च आऊ।

8मी तोरो पर तोरो मेल बली को बारेमा दोस नही लगावासू,

तोरो होम बली तो रोज चघासे।

9मी ना तो तोरो घर लक बईल ना तोरो कोठा लक बकरा लेहीन।

10काहेका जंगल को सबरी जीव–जन्तु

अखीन हजारो पहाड़ी को जनावर मोरो च आय।

11बादल को सबरी पक्सी ला मी जानासू,

धरती को जनावर मोरो च आय।”

12“अदि मी भूको होतो तो तोला नही सांगतो,

काहेकि संसार अखीन वोको सब काही मोरोच आय।

13का मी बईल को मास खावासू,

अखीन बकरा को खून पीहूँ?

14मोला आपरो परमेस्वर ला धन्यवाद को बली चघाव,

अखीन सब लक मोठो पिरभू को लयी मानता पूरो कर!

15आफद को बेरा मा मोला हाकल,

मी तोला सुडाहुँ, अना तू मोरी महीमा करजोस।”

16पर परमेस्वर दुस्ट लक कव्हासे,

“तोला मोरो बिधान बाचन

अना आपरो जुबान मा मोरो करार आनन को हक नहात।

17तू अनुसासन लक घिरना करासे,

अना मोरो बचन ला तियाग देवासेत।

18यदि तू चोर ला चोवासेत,

तो वोको संगी बन जावासेत।

छिनाला करन वालो को संग तोरो समपरक से,

19तूना आपरो जुबान बुराई को लाय सोप दियो से,

तोरी जुबान छल को गोस्टि गढासेत।

20तू बसके आपरो भाऊ बहिन को बिरोध मा

बोलासेत।

तू अपरो सग्गो भाऊ- बहिन को निंदा करासेत।

21ये काम तूना करी सेस पर मी उघोमूघो रव्हो,

तूना सोचयो का मी तोरो जसो सेऊ।

पर अबा मी तोरो निंदा करासू,

अखीन तोरो डोरा को मोहरा

आरोप सिद्द करासू।

22ओ परमेस्वर ला बिसरन वालो!

एना गोस्टि बिचार

असो नोको होय का

मी तुम्हिला फाड़के टुकड़ा-टुकड़ा कर डाकू,

अना तुम्हिला सोडान वारो कोनी नोको होय।

23जोन मोला ‘धन्यवाद-बलि’ चघावासे,

उ मोरो आदर करासेत।

जोन आपरो आचरन निरदोस रखासेत,

वोला मी परमेस्वर ,आपरो सूटकारा को दरसन

कराहुन।”