भजनसंहिता 49

धन पर भरोसा राखन को मुरखता

मुख्य बजानवालो को लाय कोराहव्ंसी को भजन

1ओ देस-देस को सब लोखहुन आयको!

ओ संसार को सब रव्हनवारो कान लगाव!

2सबरी मानूस का ऊच, का नीच, का धनी का गरीब,

तुम्हि सबरी कान लगाव!

3मोरो जुबान लक अक्कल को गोस्टि हिटत,

अखीन मोरो हिदय को गोस्टी समज को होहेत।

4मी नीतिवचन को कन आपरो कान लगाहुँ,

मी विना बजातो हुयो आपरो राज को गोस्टी परगट करहू!

5आफद को दिवस गिनमा जबा मी अड़ंगा मारनवालों गिनको,

बुराई गिनलक घिरूँ, तब मी काहे भेव खाईन?

6जोन आपरो धन मा भरोसा राखासेत,

अना लगत धन को कारन लक फूलासेत!

7उन मा लक कोनी आपरो भाऊ ला,

कोनी परकार लक नही सुडा सकेत!

उ परमेस्वर ला वोको बदला मा

आपरो पिरान को किमत काही नही दे सकत!

8काहेका वोको पिरान बचान को किमत लगत जादा से,

वो आखीर तकन चुकता नही कर सकेत!

9असो कोनी नहात जोन सदा को लाय जिन्दो रव्हेत,

अना उ समाधी मा नही जाहेत!

10काहेकी असो चोवनो मा आवासेत,का अक्कलवर भी मरासेत,

अना मूरख अना जनावर जसो मानूस दुई नास भयी जासेत,

अना आपरो धन दूसरो को लाय छोड़ जावासेत।

11वय आपरो मनच मनमा सोचासेत, का उनको घर सदा को लाय पक्को रव्हेत।

अना उनको रव्हन को जघा पीढी-पीढी तकन बनयो रव्हेत,

एकोलाय वोय आपरो-आपरो जमीन को नाव

आपरो-आपरो नाव मा राखासेत!

12पर सम्मान पायके मानूस पक्को नही रव्हासेत,

उ जनावर को जसो होवासेत जोन मर मिट जावासेत।

13उनको यो चाल मुरखता से,

तबा भी उनको बाद लोख उनको गोस्टि लक खुस रव्हासेत। (सेला)

14वय मानलो पताल लोक को सेरी-मेन्ढी को हेड़ ठयरायो गयो सेत,

मऊत उनको सेरकी ठयरो,

अखीन सक्कारी ला सीदो लोख उनको पर सासन करहेत,

अखीन उनको खोबसूरत रूप “मरन लोख को घास” भयी जाहेत,

अखीन उनको कोनी अधार नही रव्हेत।

15पर परमेस्वर मोरो पिरान ला मरनलोक को बस ले सोडा लेहेत,

काहेकी वोच गिरहन कर के मोला अपनाहेत। (सेला)

16जब कोनी मानूस धनी भयी जाय अखीन

वोको घर को महीमा बढ जाय,

तब तू भेव नोको करजोस।

17काहेकि उ मरके काही भी संग नही लिजाहेत,

नाच वोको महीमा वोको संग वोको मरघट्टी मा जाहेत।

18चाहे उ आपरो जिन्दगी मा आपरो आप ला सूखी मानहेत,

जब तू अपरो भलाई करतो रव्हे,

तब वय लोख तोरो धन्यवाद करतो रव्हेत।

19तबा भी उ आपरो पुरखा गिनको पीढी मा मिलायो जाहेत,

जोन कभ्भू उजाड़ नही चोहेत।

20मानूस चाहे सम्मान लक रव्हेत,

पर यदि वा समज नही राखासेत ता वा

जनावर को जसो सेत, जोन मर मिटासेत।