भजनसंहिता 48

परमेस्वर को नगर, सिय्योन

गीत। भजन। कोरहवंसी गीन का।

1हमरो परमेस्वर को नगर मा

अखिन अपरो पवीतर पहाड़ी पर

यहोवा महान अना लगत स्तुति को लाईक से!

2सिय्योन पहाड़ी ऊँच्चो मा खोब सुरत

अखिन सबरी धरती मा खुसी को कारन से,

राजा अधिराज को नगर उत्तर को छोर मा से।1

3वोको महेल मा परमेस्वर उच्चो किला मानो गयो से,

4चोवो, राजा लोख जमा भयो,

उनना एकसंग पूढा बढ गयो।

5पर वोय वोला चोयके चकित भयीन,

वोय घबराय के पराय गीयन।

6भेव ना उनला जकड़ लेयीस,

अखिन जचकी को दरद जसो दरद होन लगी।

7वोय तरसीस को जहाज गिन को जसो सेत,

जोनला दिन उगती को वारा तोड डाका सेस।

8सेनाहीन को यहोवा को नगर मा,

आपरो परमेस्वर को नगर मा, जसो आमी

आयकयो होतो वसो चोयो भी से

परमेस्वर ओला हमेसा पिक्को अखिन पक्को रख से। (सेला)

9ओ परमेस्वर, आमी ना तोरो मन्दिर को भीतर

मा तोरी करूना पर धियान कियो सेस।

10ओ परमेस्वर, तोरो नाम को लाय

तोरी स्तुती धरती को छोर तकन होवासेत।

तोरो उज्जो हात न्याय लक भरयो से।

11तोरो न्याय को काम को कारन लक

सिय्योन परबत खुसी मनाये,

अखीन यहूदा को नगर की टुरीगिन मगन होये!

12सिय्योन को चारी कन हिन्डो,

अना वोको आखा-पाखा चक्कर लगाव,

वोको गुम्मट गिनला मोज लेव।

13वोको नगर को परकोट पर नजर घुमाव,

वोको महेल ला धियान लक चोवो

जोनलक तुम्हि आपरो आवन वालो पीढी को लोग गिन लक

यो गोस्टि को बखान कर सको।

14काहेका यो परमेस्वर सदा-सदा आमरो परमेस्वर आय,

उ मऊत तकन आमरो अगवाई करहेत।