भजनसंहिता 99

परमेस्वर सबलक मोठो राजा आय

1यहोवा राजा भयो से, देस- देस को लोख कप उठीन,

उ करूब गिन पर विराजमान से,

धरती डोल गयीस! हिलनो उठीस!

2यहोवा सिय्योन मा महान से,

अखिन उ देस- देस को लोखगिन को वरता

मुखिया से!

3वोय तोरो महान अखिन भेव को काबिल,

नाव को धन्यवाद करबीन! वा त पवीतर से

4राजा को सामरथ न्याय लक मेल राखासेत,

तू च ना खराई ला इसतापित कियो,

नियाय अखिन नियायीपन ला आपरो चहेतो याकूब मा तू च ना लागू कियो से।

5आमरो परमेस्वर यहोवा ला सराहो,

अखिन वोको पाय मा चवकी को मोहोरा नमस्कार करो!

वोय पवीतर से!

6वोको याजकगिन मा मोसे अखिन हारून ,

अखिन वोको पिराथना करनवारो गिनमा लक सेमुएल

यहोवा ला हकलत होतो , अखिन उ उनको आयक के जवाब देत होतो।

7ओ बादर को खम्भागिन मा होयके उनको लक गोस्टि करत होतो।

अखिन वोय वोको नियम अना आदेस वोको दियो हुयो विधिगिन पर चलत होतो।

8ओ मोरो परमेस्वर यहोवा , तू वोको आयक लेहेत होतो,

तू उनको काम को साजा देत होतो

तबा भी उनको लाय छिमा करन वालो परमेस्वर होतो।

9आमरो परमेस्वर यहोवा ला पिराथना करो,

अखिन वोय पवीतर पहाड़ी पर हात जोड़ पाय पड़ो।

काहेकि आमरो परमेस्वर यहोवा पवीतर से!