भजनसंहिता 59

सुरक्सा को लाय पिराथना

मुखिया बजानवालागिन को लायी अल-तसहेत मा दाऊद को मिक्ताम, जबा साऊल को धाड़यो हुया लोखगिन ना मकान को पेहरा दियो का वोला मार डाकेत,

1ओ मोरो परमेस्वर, मोला दुस्मनगिन लक बचाय,

मोला ऊँचो जघा पर ठेव मोरो बिरोधी हुन लक बचाय,

2मोला बूराई करनवारो गिन को हात लक बचाय,

अखिन हत्यारागिन लक मोरो उध्दार कर

3काहेकि चोव, वोय मोरो घात मा लगयो सेत,

ओ यहोवा, मोरो कोनी दोस या पाप नहात,

तबा भी ताकतवर लोख मोरो खिलाप जमा होवासेत।

4मोरो कोनी भी पाप नही, वोय मी बेकसुर पर धाव-धाव के लड़न लाय तय्यार भयी जासेत

मोरो लक भेट को लायी चेत जाय, अखिन यो चोव!

5ओ सेनाहीन को यहोवा परमेस्वर,

ओ इसरायल परमेस्वर, सबरी राज-राजहुन को लोखगिन

ला सजा देवन को लायी चेत;

कोनी दगाबाज बूरो अत्याचारी पर किरपा नोको कर।

6वोय लोख सन्जा ला लवट के

कुतरा गिनको जसो गुर्रावासेत,

अखिन नगर को चारो कना च हिन्डा सेत।

7चोव वोय डकारासेत, उनको टोंड को भीतर तलवार सेत।

काहेकि वोय कव्हासेत, कोन आयकासे?

8पर ओ यहोवा, तू उनको पर हँसजोस;

तू सबरी राज-राज को लोख गिन ला मजाक मा उड़ाजोस।

9ओ मोरी ताकत, मोला तोरो च आस होहे;

काहेकि परमेस्वर मोरो उच्चो किला आय।

10परमेस्वर करूना करतो हुयो मोरो लक भेटत,

परमेस्वर मोरो दुस्मनगिन को बिसय मोरो इच्छा पूरो कर देहेत।

11उनला नोको मार, असो नोको होय का मोरी परजा बिसर जाय।

ओ पिरभू, ओ आमरी ढाल!

आपरो ताकत लक उनला तितर बितर कर, उनला दड़प दे।

12उ आपरो टोंड को पाप, अखिन ओठगिन को सबद सिराप,

अखिन साप देवन, अखिन झूठ बोलन को कारन,

गरब मा फँसयो हुया धरयो जाय।

13लगत गुस्सा मा आयके उनको आखरी कर,

उनको आखरी कर देय जोन लक वोय नास भयी जाहेत,

तबा लोख जान जाहेत,

का परमेस्वर याकूब पर, वरन धरती को सेन्डा तकन सासन करासे।

14वोय सन्जा ला लवट के कुतरा गिनको जसो गुर्रावासेत,

अखिन नगर को चार कन च हिन्डा सेत।

15वोय एक घाँस जेवन को लायी मारो-मारो हिन्डा सेत,

अखिन नही मिलन पर राती भर गुर्रावासेत।

16पर मी तोरो ताकत को गून गान गाऊ,

अखिन पहाट ला तोरी करूना की जय जयकार करहु।

काहेकि तू मोरो उच्चो किला आस,

अखिन संकट की बेरा मोरो सरन ठयरो सेस।

17ओ मोरी ताकत, मी तोरो भजन गाहु,

काहेकि ओ परमेस्वर,

तू मोरो उच्चो किला अखिन मोरो करूना करन वालो परमेस्वर आस।