भजनसंहिता 72

धरमी राजा को राज

धरमी राजा को राज सुलैमान को गाना

1ओ सुलेमान को परमेस्वर, राजा ला आपरो नियम सांग,

राजा को टूरा ला आपरो न्याय सीकाव!

2उ तोरी परजा को नियाय न्याय लक,

अखिन तोरो गरीब लोखगिन को नियाय

साजरो-साजरो करहेत।

3पहाड़ी अखिन पहाड़ी गिन लक परजा,

को लायी न्याय लक सांती भेटेत।

4उ परजा को गरीब लोखगिन को नियाय करहेत,

अखिन गरीब लोखगिन ला बचाहेत,

अखिन अन्धेर करनवारो गिनला चूरा करहेत।

5जबा तकन दिन अखिन चन्दा बनयो रव्हेत,

तबा तकन लोख पीढी- पीढी लक

तोरो भेव मानतो रव्हेत।

6वोको गवत की खूँटी पर बरसनवारो पाऊस,

अखिन धरती सींचन वाली झड़ गिनको जसी होहेत।

7वोको सासन मा न्यायी फूलेत-फरहेत,

अखिन जबा तकन चन्दा बनयो रव्हेत,

तबा तकन लगत सांती रव्हेत।

8उ समुंदर लक समुंदर तकन

अखिन मोठोनद्दी लक धरती को सेन्डा तकन

सासन करहेत। 1

9वोको मोहोरा जंगल को रव्हनवारो टोघरा टेकहेत,

अखिन वोको दुस्मन माटी चाटेत।

10तरसीस देस अखिन दीप-दीप को राजा भेट आनेत,

सेबा अखिन सबा दुय को राजा उपहार धाड़ेत।

11सबरी राजा वोको पाय पड़हेत,

राज-राज को लोख वोको अधिन भयी जाहेत,अना सेवा करे।

12काहेकि उ दोहाई देवनवालो गिन गरीब,

को अखिन दुखी अखिन बेसहारा मानूस

को बचाहेत।

13उ कंगाल अखिन गरीब पर तरस खाहेत,

अखिन गरीब गिन को पिरान गिनला बचाहेत।

14उ उनको पिरान गिनला अन्धेर अखिन हिन्सा

लक सुड़ा लेहेत।

अखिन उनको खून वोको निघा मा अनमोल ठयरेत.

15उ जिन्दो रव्हेत, अखिन सेबा को सोन्नो

मा लक वोला देवो जाहेत।

लोख वोको लाय रोज पिराथना करहेत,

अखिन दिवस भर वोला धन्य कव्हतो रव्हेत।

16देस मा पहाड़ीगिन को छिरसेन्डि मा लगत सा

फसल होहेत,

जोन उम्मभी लबानोन को देवदारगिन को झाड़

जसो झूमेत,

अखिन नगर को लोख गवत को जसो लहलहाहेत।

17वोको नाव हरामेसा-हरामेसा बनयो रव्हेत,

जबा तकन दिन बनयो रव्हेत, तबा तकन वोको

नाव रोज नवतो होतो रव्हेत,

अखिन राज-राज को लोख आपरो आप ला वोको कारन धन्य कव्हेत,

सारो लोख वोला धन्य कव्हेत।

18धन्य से यहोवा परमेस्वर ,

जोन इसरायल को परमेस्वर आय,

अचरज काम सीरप वोच करासे।

19वोको महीमा लक भरयो नाव हरामेसा धन्य रव्हेत,

अखिन सारो धरती वोको महीमा लक पूरो होहेत। आमीन मंग आमीन

20यिसै को टूरा दाऊद को पिराथना खत्म भयी।