भजनसंहिता 71

एक बुडगा को पिराथना

1हे यहोवा, मी तोरो सरन मा रव्हनवारो सेऊ;

मोरो आसा कभ्भु नही टूटेत,

2तू त न्यायी सेस, मोला सुड़ा अखिन मोरो बचाय कर;

मोरो कन कान लगाव, अखिन मोरो उध्दार कर!

3मोरो सनातन बेरा को चट्टान को जाघा बन,

जोन मा मी रोज जाय सकू;

तू मोरो उध्दार को हुकूम दियो से,

काहेकि तू मोरो चट्टान अखिन मोरो किला ठयरो से।

4ओ मोरो परमेस्वर, दुस्ट को

अखिन बुरो मानूस को हात लक

मोरो रक्सा कर।

5काहेकि ओ पिरभू यहोवा,

मी तोरो च बाट चोवतो आयो सेऊ,

लड़कपन लक मोरो सहारा तूच आस।

6मी पोटलक हिटतोच, तोरो च लक संबालो गयो,

मोला माय को पोट लक तू च हेड़यो,

एकोलायी मी रोज तोरी स्तुति करतो रव्हु।

7मी लगतसो को लायी चमत्कार बनयो सेऊ,

पर तू मोरो पक्को सरन मा रव्हन को जघा आस।

8मोरो टोंड लक तोरो गुन को बखान

अना दिवस भर तोरी गवरवको बखान

लगत होय।

9बुड़गापन को बेरा मोरो तियाग नोको कर,

जबा मोरो ताकत घट जाय तबा मोला नोको सोडजोस।

10काहेकि मोरो दुस्मन मोरो बारेमा गोस्टी करासेत,

अखिन जोन मोरो पिरान की तक्का मा सेत,

वोय आपस मा असो सला करासेत का

11परमेस्वर ना वोला सोड़ देयो से,

वोको मघा जायके वोला धर लेव, काहेका

वोको कोनी सुडान वारो नहात।

12ओ परमेस्वर, मोरो लक नोको दूहुर रव्ह,

ओ मोरो परमेस्वर, मोरो मदत को लायी

लवकर आव!

13जोन मोरो पिरान को बिरोधी सेत, उनको आस टुटेत

अखिन उनको आखरी भयी जाय,

जोन मोरो नुसकान को इक्सा राखनवालो सेत,

उनको नावधराई अखिन बेइज्जत होय

के डोस्का उच्चो नोको रव्हेत।

14मी त लगातार आसा लगयो,

अखिन तोरी स्तुति अवर जादा लक जादा

करतो जाहीन।

15मी आपरो टोंड लक तोरो नेकी को

अखिन तोरो करयो हुया उध्दार को बखान दिवस

भर करतो रव्हु,

काहेकि उनको पूरो बेवरा मोरो

समज लक बाहेर सेत।

16मी पिरभू यहोवा को बिरता को काम को बखान

करतो हुयो आहु,

मी सिरप तोरो च नेकी को चरचा करतो रव्हीन।

17ओ परमेस्वर, तू त मोला लड़कपन लक च

सिकातो आयो सेस,

अखिन अबा तकन मी तोरो अचरज को काम को परचार

करत आयी सेऊ।

18एकोलायी ओ परमेस्वर, जबा मी बुड्गा भयी गयो,

अखिन मोरो केस पिक गयो, तबा भी

तू मोला नोको छोड़,

जबा तकन मी आवनवारो पीढी को लोखगिन ला

तोरो लगत ताकत अखिन सबरी पैदा होनवाली गिन ला

तोरो ताकतवर नही आयकवाहू।

. 19ओ परमेस्वर , तोरो न्याय अति महान सेस।

तू जोन मोठोकाम करी सेत,

ओ परमेस्वर, तोरो बरोबर कोन से?

20तू त मोला लगत कठीन दुख चोवयो सेत,

पर अबा तू दुबारा लक मोला जिलाजोस;

अखिन धरती को गहेरो खोदरागिन

मा लक उबार लेवजोस।

21तू मोरो मान ला बढ़ाजोस,

अखिन मंग मोला सान्ति देवजोस।

22ओ मोरो परमेस्वर,

मी भी तोरी सच्चाई को धन्यवाद सांरगी

बजा के गाहु।

ओ इसरायल को पवीतर, मी वीना बजाय के

तोरो भजन गाहु।

23मी तोरो भजन गाहु, तबा आपरो टोंड लक

अखिन आपरो पिरान लक भी, जोन तू बचा

लियो सेस, जयजय कार करहुन।

24मी तोरो न्याय को चरचा दिवस भर करतो रव्हिन,

काहेकि जोन मोरो नुसकान को इक्सा राखनवालो होतो,

उनको आसा टूट गयी अखिन टोंड कारो भयी गयो सेत।