भजनसंहिता 2

परमेस्वर को बेचयो हुयो राजा

1दुसरो राज-राज को लोगगिन बिदरोह को योजना कायको लाय बनावासेत?

लोख आपरो बेकार साजीस कायको लाय रचासेत?

2उनको राजा बिदरोह करासेत, उनको सासक

यहोवा को निवाड़ो हुयो राजा को बिरोध मा साजीस रचासेत।1

3“आओ, आमी उनको बन्धन तोड़ डाखबिन,

अखिन उनकी दोरी गिनला आपरो वारता लक

उतार फेंकबिन।”

4उ जोन सरग मा आपरो सिघासन लक पिरभू हासासे,

पिरभू उनला मजाक मा उड़ाहे।

5तबा उ गुस्सा मा उनला डटकारयो,

अना असो सांग के उनला घबराय दियो से।

6का मीना तुमरो राजा ला तुमरो

पवीतर पहाड़ सिय्योन2 मा बसायो सेऊ।

7मी यहोवा परमेस्वर को हुकुम बिधि को परचार करहूँ,

जोन वोना मोरो लक कह्यो, तू मोरो टूरा आस,

अज मी तोरो बाप बनयो सेउ।3

8मोरो लक मांग,

अना मी देस-देस को लोक ला तोला देहू।

अना धरती को छोर तकन को जमीन

तोरो हिस्सा कर देहू।

9तू उनला लोहा को सरिया लक तोड़ डाकेत।

तू उनला माती को भान्डो जसो चकनाचूर कर डाकजोस।4

10एकोलाय अब ओ राजाहुन

ओ धरती को नियाव करन वालो

यो उपदेस गिरहन करो।

एकोलाय ओ राजा हुन, अक्कलवर बनो,

ओ अधिकारीहुन सतरक रव्हो।

11भेव को संग यहोवा को सेवा करो,

अना कपकपात हुओ वोको सासन मा खुसी मनाव।

12अना वोको पुढ़ा टोंगरा टेको, नही तो ओको गुस्सा झटाकनारी भड़क जाहेत,

अखिन तुमी एकाएक मर जावने।

धन्य से वय सबा जोन आपरी सुरक्सा को लाय वोको सरन मा जावसेत।