भजनसंहिता 44

सुरक्सा को लाय पिराथना

मुखिया बजानेवाले के लिये कोरहवंसी गीन का मस्कील

1ओ परमेस्वर, आमीना आपरो कान लक आयक से,

आमरो बापदादा हीन अमीला यव सांगी से

तूना उनको बेरा मा,

पुरानो बेरा मा काजक-काजक अद्भुत काम करयो होतो।

2तू ना आपरो हात लक राज-राज को लोगहुन ला हेड़ दियो,

अखिन इनला बसायो; तू न देस-देस को लोखहीन को दुख दियो

अखिन इनको आखा-पाखा फैलाय दियो;

3कायकि वय न तो आपरी तलवार को ताकत लक

इस देस को अधिकारी भयो,

अखिन आपरो बाहुबल लक; आन तोरो उज्जो हात

अखिन तोरी भुजा अखिन तोरो परसन टोन्ड़ को कारन

जय जयकार भयो; काहेकि तू उनला चाहत होतो।

4हे परमेस्वर, तू च आमरो माहाराजा आस,

तू याकूब ला उध्दार को हुकुम देवासे।

5तोरो सहारा लक अमी आपरो बयरी गीनला ढकेल के पाड़ देहेत

; तोरो नाव को परताप लक अमी आपरो विदरोही हीनला कुचल देवासे

6मोला आपरो धनुस पर भरोसा नहात,

अखिन मोरी तलवार च मोला बचाय सका से।

7तूना अमीला आमरो दुसमन हीन लक बचावासे,

आमरो बयरी ला तूना निरास अना लज्जित करयो से।

8आमी परमेस्वर की बड़ाई दिवस भर करत रव्हा सेजन,

अखिन हरामेसा तोरो नाव को धन्यवाद करत रहेत।

9तबा भी तूना अमीला तियाग दियो, अखिन आमरो अनादर कियो से।

अना तू आमरो दलगिन को संग मा संग पुढ़ो नही जावासे।

10तूना आलमला विवस करयो कि आमी आपरो बयरी ला पाड़ चोवायो,

जोन आमी लक घिरना करत होतिन उनना आमला लूट लियो।

11तू न आमीला कसाई को मेंढा को हेड़ को जसो कर दियोस से,

अखिन आमला राज-राज मा तितर-बितर करयो से।

12तून आपरी परजा ला पूरो को पूरो भाव मा बिक दियोस;

तूना मोल लक फायदा नहीं कमायो।

13तूना आमरो सेजारी मा आमरी नावधराई करासे।

अखिन आमरो आखा-पाखा को रव्हन वारो

आमरो लक हँसी ठठ्टा करासे।

14तूना आमीला आपरो राज मा असो सांग के मजाक को कारन बनायो से।

अखिन देस-देस को लोख आमरो कारन डोस्का हिलाव से।

15दिवस भर आमी ला बेज्जती सहनो पड़ से

कलंक लगावनो अखिन निन्दा करन वारो को सब्द लक,

16दुसमन अखिन बदला लेवन वारो को कारन ,

बुरो-भलो कव्हन वारो अखीन निन्दा करनवारो को कारन।

17एव सबा काही आमरो पर बीतायो तबा भी आमी तोला नही भूलयो।

न तोरो करार को खिलाप बिस्वास घात नहीं करयो से।

18आमरो हिरदा तोरो लक बिमुख नहीं भयो;

आमरो पाय तोरो रास्ता लक नहीं मुरको।

19तबा भी तूना आमीला कोल्हिया को जाघा मा पीस डाक्यो,

अखिन आमी ला घनो इंधार मा लुकाय दियो सेस।

20कदी आमी आपरो परमेस्वर को नाव भूल जासेत,

या कोनी परायो देव को कन आपरो हात फैलायो,

21तो काय परमेस्वर एको बिचार नही करत?

काहेकि उ मन को लुकयो हुयो गोस्टी ला जानसे।

22मंग आमी दिवस भर तोरो कारन,

मौत को घाट उतर जावासे;

आमी बध होवनवारी मेंढा को हेड़ जसो समझ गयो।

23ओ पिरभू, तू जाग, काहे जप मा से?

उठ, आमीला हमेसा को लाय नोको तज।

24तू अपरो टोन्ड़ कायको लाय लुकायो रव्हासे ?

कायलाय तूना आमारी पीड़ा अखिन को कस्ट भुलाय दियो से?

25आमरो पिरान माती लग गयो से,

अखिन पोट धरती मा चिपक गयो से।

26उठ, अखिन आमरी मदत कर,

आपरी करूना को कारन आमारो उध्दार कर।