भजनसंहिता 45

राजा को लाय बिहाव गान

मुखियाबजान वालो को लाय सोसनीम राग मा कोरहवंसी गीन का मस्कील। माया को गीत

1मोरो हिरदा मा सुन्दर भाव उमड़ रही से

जोन गोस्टी मीना राजा को बारे मा बनायो से, वोला सांगसूँ;

मोरी जिबली साजरो गढन वालो की लेखनी बनयो से।

2तू मानूस गिन को सन्तान हीन मा बेझा खोबसूरत सेत।

तोरो ओठ मा दया भरयो हुयो से।

एकोलाय परमेस्वर न तोला हमेसा को लाय आसीस दियो से।

3ओ बीर, तू आपरी तलवार को जोन तोरो महीमा अखिन परताप से,

आपरी कम्मर मा बान्ध।

4सत नरमपन अना नेकी को लाय आपरो यस अखीन परताप को सफलता लक सवार होयके,

तोरो उज्जो हात तोला अद्भुत काम सिकायो।

5तोरो तीर तो तेज से, तोरो मोहरा राज-राज को लोख पड़ेत

राजा को दुसमन को हिरदय मा वोको लक छिदेत।

6ओ परमेस्वर, तोरो सिंघासन हमेसा-हमेसा बनयो रव्हे तोरो नियाव को राज दन्ड से।

7तोरो नेकीपन लक पिरेम करा से,

अखिन दुस्टता लक घिरना राख्यो से।

एकोलाय परमेस्वर ना, हव तोरो परमेस्वर ना तोला तोरो संगीहीन

लक जादा, हरस को तेल लक तोरो अभिसेक करयो से।

8तोरो कपरा सुगन्ध वाला चीज, अगर अखिन तेज लक महका से।

तू हाती-दांत लक महल ला सजायके महलगिन मा तार वालो बाजा को कारन खुस भयो।

9अवो राजकुमारी मा लक तोरी उज्जो कन पटरानी, ओपीर को सोन्नो लक सजी उभी से।

10अवो राज कुमारी आयक, बिचार कर अखिन धियान देव;

आपरी लोख अखिन मायके ला भूल जाय।

11तब राजा तोरो रूप ला चाहेत।

काहेकि ऊ तोरो स्वामी से तू ओको मोहरा सिर नवाव।

12सोरो देस की राजकुमारी भी भेट करन को लाय हाजीर होहेत।

परजा को धनवान लोख तोला खूस करन को लाय जतन करहेत।

13राजकुमारी महल मा लगत सोभामान से,

ओको कपरा मा सुनहरो बूटा कढो हुयो से;

14ऊ बूटेदार कपरा घाल्यो भयो राजा को जवर धाड़यो जाहे।

जोन कुमारी हीन ओकी सहेलीहीन से,

वय ओको मघं-मघं चलत हुई तोरो जवर पहुँच जाहेत।

15वय खुस अखिन मगन भय के पहुँच जाहेत

अखिन वय राजा को महल मा धसेत।

16तोरो पूरखा को जगह मा तोरो टुरा होहेत

जेको तू सारी धरती पर अधिकारी ठहराहे।

17मी एसो करुह, कि तोरो नाव की गोस्टी

पीढी लक पीढ़ी तक होती रव्हे,

ऐको कारन देस-देस को लोख सदा

तोरो धन्यवाद करत रहेत।