भजनसंहिता 144

राजा को लक जीतनो पर परमेस्वर को धनवाद पिराथना

दाऊद को भजन

1धन्य से, यहोवा, जोन मोरी चट्टान से ,

उ मोरो हात गिनला लड़न अना

युध्द करन को लाय तैय्यार करासेत।

2उ मोरो करूना निधान अना किला,

ऊँच्चो जघा अना सोडान वालो से,

उ मोरी ढाल अना सरन जघा से,

जोन मोरो परजा ला मोरो बस मे कर देवासेत।

3ओ यहोवा, मानूस काजक आय

कि तू वोकी सुधि लेवासेत,

या मानूस काजक से का तू वोको

काही चिन्ता करासेत?

4मानूस त सास को जसो से,

वोको दिवस ढ़लतो हुयो सावली को जसी से।

5ओ यहोवा, अपरो सरग ला खाल्या करके उतर आय!

पहाड़गिन ला छिव, तबा उनलक धुगाँ उठेत!

6बिजली कड़काके उनला तितीर-बितीर कर देय,

आपरो तीर चलाय के उनला गुमराह कर देय!

7आपरो हात वरता लक बढाय के

मोला महासागर लक बचा लेव ,

मजे परदेसी गिन को हात लक सोडाय!

8उनको टोन्ड लक तो बेकार को गोस्टि हिटा सेत,

अखिन वोको उज्जो हात1 लक धोखा को काम होवासेत!

9ओ परमेस्वर, मी तोरी एक नवतो गाना गाबोन,

मी दाहा तारवाली सारंगी बजाय के ,

तोरो भजन गाबोन!

10तू राजा गिनको उध्दार करासेत,

अखिन अपरो दास दाऊद ला

तलवार को मार लक बचावासेत।

11तू मोला उबार अखिन परदेसी गिनको

हात लक सोड़ाय लेय,

जोन को टोंड लक बेकार को गोस्टी हीटासे,

अना जोनको उज्जो हात झूठ को उज्जो हात से।

12जबा आमरो टूरा जवानी को बेरा

पवधा गिनको जसो बढयो हुयो होय!

अखिन आमरो टूरीगिन उन कोना वालो खम्बा को जसो होय!

जोन महेल को लाय बनाव जाय!

13जबा आमरो कोठी- ढोला भरयो रव्हेत, अना उनमा किसम- किसम को अनाज ठेयो जाय,

अखिन आमरो सेरी-मेंढी गिनको हेड़ आमरो बर्रा

मा हजार-हजार बच्चा देय।

14जबा आमरो बइल खूब बोझा लाद के खीचेत।

भीत नही तोड़यो जाहेत , अना आमरो कोनी बन्दी बनायो जावनो नोको होय! अना नातो आमरो सडक मा रोवनो पीटनो होय!

15ता एव दसा मा जोन राज्य होय वा का च धन्य होहेत! जेको बारो मा सही से धन्य से वोय लोख

जोन राज्य को परमेस्वर यहोवा से,

उ काच धन्य सेस!