भजनसंहिता 143

सूटकारा को लाय पिराथना

दाऊद को भजन

1ओ यहोवा, मोरो पिराथना आयक,

मोरो गिड़गिड़ानो को कन कान लगाय!

तू जोन भरोसा कबील अना न्यायी से,

एकोलायी मोरो आयक ले,

2अखिन अपरो दास लक मुकदमा नोको चलाय!

काहेकि कोनी पिरानी तोरो नजर मा

निरदोस नही ठयर सकासेत।

3दुस्मन तो मोरो पिरान को खरीददार भयो से,

वोना मोला चूरा करके माती मा मिलायो से,

अना मोला लगत दिवस को मरयो हुयो को जसो

इन्धारो जघा मा डाक दियो से।

4मोरो आत्मा भीतर लक बियाकुल

भयी रही से। मोरो मन गहरो निरासा मा सेव।

5मोला जूनो जमाना को दिवस हेत आवासेत,

मी तोरो अदभूत काम गिन पर धियान करासेऊ!

अना तोरो काम ला सोचासू!

6मी तोरी कन आपरो हात फैलायो हुयो सेऊ।

सूको जमीन को जसो मी तोरो तहान सेऊ!

7ओ यहोवा, लहाकी करके मोरी आयक ले,

काहेका मोरो पिरान हिटन परच सेत!

मोरो लक आपरो टोन्ड नोको लुकाव!

असो नोको होय का मी समाधी मा पडयो

हुयो को जसो भयी जाऊ!

8हरेक सक्कारी अपरो करूना को गोस्टी मोला लवकर आयकवाओ

काहेकि मी ना तोरोच पर भरोसा राख्यो से,

जोन रास्ता मा मोला चलनो से

वा मोला सांग देय!

काहेका मी आपरो मन तोरो च कन लगावासू।

9ओ यहोवा, मोला दुस्मन गिन लक मोला बचाय ले,

मी तोरो च आड़ मा आयके लुकयो सेऊ!

10मोला सिका का मी तोरो मनसा पूरो करू,

काहेका मोरो परमेस्वर तू च आस!

तोरो भला आत्मा मोला सुरक्सा को रस्ता मा ले चल!

11ओ यहोवा, मोला आपरो नाव को लाय जिवित कर!

तू जोन न्यायी से, मोला संकट लक सोड़ाय ले!

12अना विधान अना पिरेम करके मोरो दुस्मन गिनको

सतियानास कर,

अखिन मोरो सबरी सतान वालो गिन

को नास कर डाल , काहेकि मी तोरो दास सेऊ।