भजनसंहिता 32

छिमा पावन को लाय की आसीस

(दाऊद को भजन मस्कील )

1धन्य से उ मानूस, जेको अपराध छिमा कर दियो गयो,

अखिन जेको पाप झांकयो गयो।

2धन्य से उ मानूस जेन को अधरम को लेखा पिरभू नहि लेहे,

अखिन जेको मन मा कपट नाहाय। 1

3जबा मी चुप रह्यो तबा दिवस भर कराहवत-कराहवत

मोरी हड्डीहुन घुर गयी।

4ओ पिरभू दिवस राती मा तूना मोला दन्ड दियो से ,

मोरो ताकत पूरो लक खतम भयि गयो से ,

जसो उन्हारो को गरमी लक नमी सूक जावासेत।

5जबा मी ना आपरो पाप तोरो जवर सुवीकार करयो

अखिन आपरो अधरम नहि लुकायो,

अखिन सांगयो “मी यहोवा को समोर आपरो पापहुन ला मान लेहु”

तबा तूना मोरो अधरम अना पाप ला छिमा कर दियो।

6एना कारन लक हरेक सेवक तोरो लक असो बेरा मा पिरथना करेत;

जबकि तोरो लक भेट होय सका से ,

पक्को पानी की मोठी पूरा-पानी आहेत,

तो भी वोना भगत को जवर नही आहेत।

7तू मोरो लुकन को जाघा आस;

तू सकंट लक मोरी रक्सा करजोस,

तू मोला चारीकन लक छुटकारा

को गीत लक घेर लेवजोस।

8पिरभू कव्हासे; “मी तोला अक्कल देहू ,

अना जोन रास्ता मा चलनो होहेत वोमा तोला लेके जाहून

मी तोरो पर दया को निघा करहून,अना सला देहू।”

9तुम्ही घोड़ो गिन अखिन खच्चर जसो नोको भयी जाव!

जेको मा अक्कल नहीं रव्हसे जेला कासरा,

अखिन लगाम लक बस मा करनो पड़ासे

नही ता वोय बस मा नही आहेत।

10दुस्ट ला तो लगत दुख होहे

अना जोन यहोवा मा भरोसा राखासे।

उ दया लक घिरयो रव्हे।

11ओ न्यायी लोखहुन, यहोवा को कारन खूसी अखिन मगन होय;

अखिन ओ सब सीदो मन वारो; खुसी लक जय जयकार करो।