भजनसंहिता 33

स्तुति को गीत

1ओ न्यायी लोगहुन, यहोवा को कारन जय जयकार करो।

काहेकि इमानदार लोख ला स्तुति करनो सोभा देवासे।

2बीना बजाय-बजाय के यहोवा को धन्यवाद करो,

दहा तारवारी सारंगी बजाय-बजाय के ओको भजन गाओ।

3ओको लाय नवतो गीत गाओ, जय जयकार को संगा साजरो लक बजाओ।

4काहेकि परमेस्वर को बचन सीदो से;

अखिन ओको सबा काज सच्चाई लक होव्ह से।

5उ नेकीपन अखिन नियाव लक पिरेम करासे,

यहोवा को करूना लक धरती भरो पूरयो से।

6वरता को जाघा1 परमेस्वर को बचन लक अखीन सरग को सेना;2

वोको टोन्ड को सांस लक बनयो से।

7पिरभू ना सागर को पानी ला

मान लेव भन्डार गिनमा जमा कियो से।

8सप्पा धरती को लोख यहोवा पिरभू लक डराव,

जगत को सप्पा रव्हन वालो वोको भेव मानो।

9काहेका पिरभू ना कह्यो,अखीन उ भय गयो;

ओने आदेस दियो, अखिन पक्को भय गयो। 3

10पिरभू राज-राज को सलाह ला बिफल कर देव्ह से ;

उ राज-राज को बिचार ला बेकार कर देव्ह से।

11पिरभू को जुक्ति हरामेसा को लाय पक्को रव्हासे;

ओको हिरदा को बिचार पीढ़ी लक पीढ़ी बनयो रव्हासे।

12धन्‍य से उ राज जेको परमेस्वर पिरभू से;

धन्य सेत उ लोख जिनला पिरभू ना आपरी मीरास को लाय निवाड़ लियो से।4

13यहोवा सरग लक निघा करासे;

उ सप्पा लोखहुन ला चोवासेत।

14उ आपरो रव्हन को जाघा लक,

उ धरती मा को सबरी रव्हनवारो ला चोवासे,

15वोच उनको सबरी हिरदा गिन ला बनायो से;

अखिन उनको सब बिचार गिनला परखा से।

16कोनी भी राजा को उद्धार ओकी बिसाल सेना लक नहीं होव्ह से ;

कोनी भी बीर को ताकत वोला नही बचा सकासेत।

17बच के हिटन को लाय घोड़ो बेकार से,

;उ आपरी मोठी ताकत लक कोनीला भी नही बचाय सकत।5

18चोवो, यहोवा की निघा वोको लक डरान वालो पर,

अखिन उनको पर जोन वोकी करूना की आसा रखासेत, बनयो रव्हासे।

19का उ उनको पिरान ला मरन लक बचाहे,

अखिन गिरानी को बेरा जिन्दो राखे।

20आमी पिरभू पर आस ठेवासेत

वोच आमरो रक्सक अना सहायक से।

21आमारो हिरदा वोको कारन खुस होवासे।

काहेकि आमी पिरभू को पवीतर नाव मा भरोसा ठेयो सेजन।

22ओ पिरभू जसी तोरो मा आमरी आस से

वसीच तोरी करूना आमरो पर होय।