भजनसंहिता 34

परमेस्वर की भलाई को लाय ओकी स्तुति

(दाऊद को भजन जबा ऊ अबीमेलेक को मोहरा बैताड़-सा बनयो अखिन अबीमेलेक न ओने हेड़ दियो अखिन ऊ चलयो गयो।)

1मी हरेक बेरा यहोवा ला धन्य कव्हू;

ओकी स्तुति हरामेसा मोरो टोन्ड लक होवत रव्हे।

2मी यहोवा पर गरब करहु,

नरम मानूस येव आयक के खुसी होहेत।

3मोरो संग पिरभू को गुन गान करो

आव, आमी ओको नाव को स्तुति करेंह।

4मी यहोवा को जवर गयो, तब ओने मोरी आयक लियो।

अखिन मोला पूरो रीत लक निडर करयो।

5जिन ना ओकी कन निघा करयो उनला उजाड़ भेंटयो,

वय कभ्भु आपरो भरोसा को कारन नहि लज्जाहेत।

अखिन उनको टोंन्ड कभ्भु कारो न भय पाहे।

6यो गरीब जन न हाकलयो तबा यहोवा न आयक लियो,

अखिन उनला उनको सप्पा कस्ट लक बचाय लियो।

7यहोवा को डरन वारो ला चारिकन लक, वोका दूत

छावनी करयो होय उनला बचाव से।

8परख के चोवो का पिरभू ना केतरो भलो से।

धन्य से उ मानूस जोन पिरभू की सरन मा आवासे।

9ओ पिरभू को पवीतर लोखगिन, पिरभू लक डरो।

जोन लोख पिरभू लक डरा सेत उनला काही कमी नहीं होहे।

10जवान सेर हिनला ता कमी होवासे।

अखिन वय भूखो भी रव्हत से,

अना यहोवा को तपासन वारो ला

कोनी भली जुनुस की कमी नहि होहे।

11ओ लेकराहुन टुरागिन, आवो मोरी आयको,

मी तुम्हिला यहोवा को भेव माननो सिकाहूँ।

12उ कोन मानूस से जोन जीवन लक पिरेम को इक्सा राखासे;

जोन जादा जीवनो चाव्हासे वा भलाई ला चोव सकासे?

13आपरी जुबान ला बुराई लक दुहुर राख,

अखिन ओको ओंठ लक छल-कपट को गोस्टी नोको हिटे।

14बुराई ला छोड़ो अखिन भलाई करो;

सांती ला तपासो, अखिन ओको मघा जाव!

15पिरभू का डोरा न्यायीगिन पर लगयो रव्हासे।

अखिन उनको कान उनकी दुहाई मा लगयो रव्हासेत।

16पिरभू को टोन्ड बुराई करन वारो को खिलाप से।

जोन लक उनको नाव धरती मा लक मिट जाहे।

17न्यायी दुहाई देवासे अखिन यहोवा आयक से,

अखिन उनला सप्पा बिपत्ती लक छुड़वा से।

18यहोवा टुटयो मन वारो लोगहुन को जवर रव्हा से।

अखिन पिसयो हुयो ला बचावासेत।

19न्यायी मानूस मा दुख गजब ता पड़ा से।

मंग यहोवा उनला सबा लक बचावासे।

20उ उनकी सबा हाड़-हाड़ ला सजरो राखासे।

उनमा लक एक भी नहि टुटेत। 1

21दुस्ट आपरी बुराई लक मारयो जासे

अखिन न्यायी ला बयरी दोसी ठयराहेत।

22यहोवा आपरो लोखहुन ला बचाहेत,

जोन लोख वोको जवर सुरक्सा को लाय जावसेत। वोय दोसी नही ठयरेत।