भजनसंहिता 35

दुस्मनहुन लक छुटकारो को लय पिराथना

दाऊद का भजन

1हे यहोवा,जोन मानूस मोरो संग मुकद्दमा लड़ा से,

उनको साथ तू मुकद्दमा लड़;

जोन मोरो लक लड़ाई करासेत,

ओको लक तू लड़ाई कर।

2तू ढाल अखिन भाला लेय के

मोरी मदत करन लाय उभो होय।

3जोन मानूस मोरो मघा आवासेत,

उनको खिलाप बरछी अखिन भाला उठाव।

तू मोरो लक येव कव्ह, “मी च तोरो उध्दार करता सेऊ।”

4जोन मानूस मोरो पिरान को खोजी से

वय लज्जित अखिन बेइज्जत होय।

जोन मोरी बुराई को उपाय कर से,

वय मघा हट जाहे अना भरम मा पड़ जाहे।

5वय वारा लक उड़ जान वारो भूसी को जसो होय,

अखिन यहोवा को दूत उनला हाँकत जाहे।

6उनको रास्ता इन्धियारो अखिन घसरन लक भरयो होय

अखिन यहोवा को दूत उनला खदेड़त जाय।

7बिना कारन को उनना मोरो लाय खोदरा मा जाल बिछायो सेत ;

बिना कारन को च उनना मोरो लाय खोदरा खोदयो से।

8पर एकोलक पुढ़ा वय समझ पाहे

उनको पर सत्यानास आ जाहेत,

अखिन वोय आपरो जाल मा फस जाहेत,

अना वोय नास भयी जाहेत।

9अना मी वोको दया लक खूसी होबीन। परमेस्वर को उध्दार लक खुसी होहेत।

10परमेस्वर गरीब मानूस ला मोठो-मोठो बलवान लक बचावासे।

अखीन लुटेरागिन लक गरीब लोख को रक्सा करासेत।

11मोरो बिरुद हिंसक गवाह उभो होव्ह से ;

जोन बात मी नहीं जानासु ,वोच वय मोला पूछा से।

12उ मोरो लक भलाई को बदले मा बुराई कर से,

यहाँन तकन कि मोरो पिरान अब निरासा मा चले जावासेत।

13पर जब वय रोगी होतीन तब तो मी टाट पहिनयो रह्यो,

अखिन उपास कर करके दुख उठायो रहयो,

अखिन मोरी पिराथना को फर मोरी गोदी मा आपिस लवट आयो।

14मी असी भावना रखत होतो कि मानो वय मोरो संगी या भाऊ सेत।

जसो कि कोनी माय लक विलाप करत होये, वसो च मी ना सोक को पहिरावा घाल्यो हुयो

डोस्का नवाय के सोक करयो।

15अना जब मी दड़खाड़ान लगयो तब,

वय लोख खुस भय के जमा भइन

अना नीच लोख अखिन जिनला मी जानत भी न होतो

वय मोरो बिरुद मा जमा होयके मोला फाड़त रहीन,

16उन ना दुस्टता लक मोरो मजाक उड़ायो।

वय मोरो पर दांत पीसत रह्यो।

17हे पिरभू तू कब तकन देखत रव्हजोस ?

येव आफत, जोन मोरो पर डाकयो से ओको लक मोला छुड़ाव।

जुवान सेर लक मोरो पिरान ला बचाय ले।1

18मी मोठी सभा मा तोरो धन्यवाद करुँ

लगत लोख हीन को बीच मा तोरी स्तुति करुँ।

19मोरो खोटो बोलन वारो दुस्मन मोरो खिलाप खुस नोको होहे।

जोन बीना कारन मोरो बयरी से,

वय आपस मा डोरा लक इसारा नोको कर पाहे।

20काहेका वोय मेल को गोस्टी नही कव्हासेत,

पर देसमा जोन सान्ति लक रव्हासेत,

उनको बिरोध मा छल को गोस्टि करासेत।

21वोय मोरो पर आरोप लगाके चिल्लावासेत,

“आहा,आहा, अमीना आपरो डोरा लक चोयो से।”

22ओ यहोवा , तूना तो देख्यो से, चुप नोको रव्ह! ओ पिरभू मोरो लक दुहूर नोको रव्ह।

23उठ मोरो नियाव को लाय जग,

ओ मोरो परमेस्वर, ओ मोरो स्वामी।

मोरो मुकद्दमा को निरनय लाय आव।

24ओ मोरो परमेस्वर यहोवा, तू आपरो धरम को अनुसार

मोरो नियाय कर अखिन उनला मोरो खिलाप खुसी नोको होवन दे।

25वय मन मा न कव्हनो पाये

“आहा, आमरी इच्छा पूरी भय गयी।” वय येव न कव्हनो पाय

“आमी ओला गीटक लियो से।”

26जोन मोरी हानि लक खुसी होवासेत,

उनको टोंड लज्जा को मारे एक संग कारो होय।

जोन मोरो खिलाप बड़ाई मारा सेत वय लज्जा

अखिन अनादर लक झक जाहेत।

27जोन मोरो नेकीपन लक खुसी होवासेत,

वोय जयजय कार अना मजा करे।

अना लगातार कव्हतो रव्हे यहोवा को बडाई होय।

जोन आपरो दास को कुसल ले खूस रव्हासेत।

28तबा मोरो तोनड लक धरम को चरचा होहेत अखीन दिवस भर तोरो स्तूती होतो रव्हे।