भजनसंहिता 63

तहान मन परमेस्वर मा तहान बुझनो

दाऊद को भजन , जबा उ यहूदा को जंगल मा होत होतो .

1ओ परमेस्वर, तू मोरो परमेस्वर आस, मी तोला उपाय लक तपासू,

सुक्को अखिन बिन पानी को ऊसर जमीन मा, मोरो मन तोरो तहान से,

मोरो तन तोरो लगत इक्सा राखासे।

2असो पिरकार लक मी पवीतर जघा मा तोरो पर निघा करयो ,

का तोरो ताकत अखिन महीमा ला चोवू।

3काहेकि तोरी करूना जिन्दगी लक भी साजरो से, मी तोरी परसंसा करून।

4योच पिरकार मी जिन्दगी भर तोला धन्य कव्हतो रव्हु ;

अखिन तोरी नाव ले आपरो हात उभो करून।

5मोरो जीव मानो चरबी अखिन चिकनो जेवन लक अघा जाहे,

अखिन मी जय जयकार करके तोरी स्तुति करहीन।

6जबा मी हतरन गिन मा पड़यो तोरो हेत करू,

तबा राती को हर एक पहर मा तोरो पर धियान करहीन;

7काहेकि तू मोरो मदत करन वालो बनो से,

एकोलायी मी तोरो पंखा को सावली मा जय जयकार करहीन

8मोरो मन तोरो मघा-मंघा चलासे;

अखिन मोला त तू आपरो उज्जो हात लक थामयो राखासेत।

9पर जोन मोरो पिरान को खोजी सेत,

वोय धरती को खाल्या जघा गिनमा जाय के पड़ जाहेत,

10वोय तलवार लक मारयो जाहेत,

अखिन बीघा गिनको खानवारो चिज भयी जाहेत।

11पर राजा परमेस्वर को कारन खुस होहे;

जोन कोनी पिरभू को किरिया खायो,

वोय बड़ाई करनो पाहेत, पर झूठ बोलनवारो गिन को टोंड बंद करयो जाहेत।